അന്ന് ചാന്‍സ് ചോദിച്ചു, അദ്ദേഹം മരക്കാറില്‍ കാസ്റ്റ് ചെയ്‌തെങ്കിലും എനിക്കത് നഷ്ടമായി: അജു വര്‍ഗീസ്

വിനീത് ശ്രീനിവാസന്റെ മലര്‍വാടി ആര്‍ട്‌സ് ക്ലബ്ബ് എന്ന ചിത്രത്തിലൂടെ സിനിമാ കരിയര്‍ ആരംഭിച്ച നടനാണ് അജു വര്‍ഗീസ്. കരിയറിന്റെ തുടക്കത്തില്‍ കോമഡി വേഷങ്ങളില്‍ തിളങ്ങിയ അജുവിന്റ കരിയറില്‍ വഴിത്തിരിവായത് ഹെലന്‍ എന്ന ചിത്രമായിരുന്നു.

സിനിമയിലെ അജുവിന്റെ നെഗറ്റീവ് കഥാപാത്രം ഒരുപാട് ശ്രദ്ധിക്കപ്പെട്ടിരുന്നു. കമല എന്ന ചിത്രത്തിലൂടെ നായകവേഷവും തനിക്കിണങ്ങുമെന്ന് അജു തെളിയിച്ചിരുന്നു. ഇപ്പോള്‍ നാന സിനിമാവാരികക്ക് നല്‍കിയ അഭിമുഖത്തില്‍ ഏതെങ്കിലും സംവിധായകന്റെ കീഴില്‍ വര്‍ക്ക് ചെയ്യണമെന്ന് ആഗ്രഹമുണ്ടോയെന്ന ചോദ്യത്തിന് മറുപടി നല്‍കുകയാണ് അജു വര്‍ഗീസ്.

തന്റെ ആദ്യ ചിത്രം മാത്രമേ ആഗ്രഹിക്കാതെ തന്നെ തേടി വന്നിട്ടുള്ളൂവെന്നും പിന്നീടുള്ള കഥാപാത്രങ്ങളില്‍ ഏറെയും താന്‍ താത്പ്പര്യമെടുത്ത് കിട്ടിയിട്ടുള്ളതാണെന്നും നടന്‍ പറഞ്ഞു. സംവിധായകരായ ജോഷി, പ്രിയദര്‍ശന്‍ എന്നിവരോട് ചാന്‍സ് ചോദിച്ചതിനെ കുറിച്ചും അജു അഭിമുഖത്തില്‍ പറയുന്നു.

‘ഏതെങ്കിലും സംവിധായകന്റെ കീഴില്‍ വര്‍ക്ക് ചെയ്യണമെന്ന് ആഗ്രഹമുണ്ടോയെന്ന് ചോദിച്ചാല്‍ എന്റെ ആദ്യ ചിത്രം മാത്രമേ ഞാന്‍ ആഗ്രഹിക്കാതെ എന്നെ തേടി വന്നിട്ടുള്ളൂ. പിന്നീടുള്ള കഥാപാത്രങ്ങളില്‍ ഏറെയും ഞാന്‍ താത്പ്പര്യമെടുത്ത് കിട്ടിയിട്ടുള്ളതാണ്.

നിവിന്‍ പോളിയുടെ കൂടെ അവന്റെ കല്യാണത്തിന് ജോഷി സാറിനെ ക്ഷണിക്കാന്‍ പോയപ്പോഴാണ് അദ്ദേഹത്തിന്റെ ഒരു സിനിമയില്‍ വേഷം തരണമെന്ന് ഞാന്‍ പറഞ്ഞത്. നിങ്ങളെ വെച്ചൊക്കെ ഒരു സിനിമ ഞാന്‍ പ്ലാന്‍ ചെയ്യുന്നുണ്ടെന്നായിരുന്നു അദ്ദേഹത്തിന്റെ മറുപടി. ആ സിനിമയാണ് സെവന്‍സ്.

അതുപോലെ പ്രിയന്‍ സാറിനോടും അങ്ങോട്ട് ചെന്ന് ഒരു വേഷം തരണമെന്ന് ആവശ്യപ്പെടുകയായിരുന്നു. ഒപ്പം എന്ന സിനിമ അങ്ങനെ ലഭിച്ചതാണ്. മരക്കാറില്‍ എന്നെ ഒരു വേഷത്തിന് വേണ്ടി കാസ്റ്റ് ചെയ്തിരുന്നെങ്കിലും ഡേറ്റ് ക്ലാഷ് കാരണം അതിന് അവസരമുണ്ടായില്ല,’ അജു വര്‍ഗീസ് പറഞ്ഞു.

Content Highlight: Aju Varghese Talks About Marakkar Arabikadalinte Simham Movie And Priyadarshan