കൊല്‍ക്കത്ത: ഐ.പി.എല്‍ മത്സരത്തിനിടെ എതിര്‍ താരത്തിന്റെ തലയ്ക്ക് നേരെ പന്തെറിയാന്‍ ആവശ്യപ്പെട്ട ബാഗ്ലൂര്‍ റോയല്‍ ചലഞ്ചേഴ്‌സ് നായകന്‍ വിരാട് കോഹ്‌ലി. കൊല്‍ക്കത്ത വിജയം ഉറപ്പിച്ച രീതിയില്‍ മുന്നേറവെയാണ് ആന്ദ്രെ റസ്സലിന്റെ തലയ്ക്ക് നേരെ പന്തെറിയാന്‍ കോഹ്‌ലി ഫാസ്റ്റ് ബൗളര്‍ ഉമേഷ് യാദവിനോട് ആവശ്യപ്പെട്ടത്.
സംഭവത്തിന്റെ വീഡിയോ ദൃശ്യങ്ങള്‍ സോഷ്യല്‍മീഡിയയില്‍ പ്രചരിക്കുകയാണ്. കൊല്‍ക്കത്ത 151 നു 5 എന്ന നിലയില്‍ നില്‍ക്കെയാണ് റസ്സലിന്റെ തല ലക്ഷ്യമാക്കി പന്തെറിയാന്‍ ഉമേഷ് യാദവിനോട് കോഹ്‌ലി ആവശ്യപ്പെട്ടത്. ഈ രീതിയിലായിരുന്നു ഉമേഷ് പല പന്തുകളും എറിഞ്ഞത്.
തലയ്ക്ക് നേരെ വന്ന ബൗണ്‍സറുകളില്‍ റസ്സല്‍ റണ്‍സ് കണ്ടെത്താന്‍ വിഷമിക്കുകയും ചെയ്തിരുന്നു. മത്സരത്തിന്റെ 17 ാം ഓവറിലാണ് സംഭവം. ബാംഗ്ലൂരിന്റെ മിക്ക ഫാസ്റ്റ് ബൗളര്‍മാരും ഇത്തരത്തിലുള്ള ബൗണ്‍സറുകളാണ് എറിഞ്ഞിരുന്നത്. ടീമിന്റെ തന്ത്രത്തിന്റെ ഭാഗമാകാം ഇതെന്നാണ് കരുതപ്പെടുന്നത്.
ഷോര്‍ട് ബോളില്‍ റണ്‍ കണ്ടെത്താനാകാതെ റസ്സല്‍ പതറുമ്പോള്‍ ഫീല്‍ഡില്‍ കോഹ്‌ലിയും സഹതാരം മക്കല്ലവും ചിരിക്കുന്നതും വീഡിയോ ദൃശ്യങ്ങളില്‍ വ്യക്തമാണ്. ആന്ദ്ര റസ്സല്‍ 11 പന്തില്‍ നിന്നു നേടിയ 15 റണ്‍സാണ് കൊല്‍ക്കത്തയുടെ വിജയം പൂര്‍ത്തിയാക്കിയിരുന്നത്. മത്സരത്തില്‍ 4 വിക്കറ്റിനായിരുന്നു കൊല്‍ക്കത്തയുടെ ജയം.
വീഡിയോ കാണാം: