കൊല്‍ക്കത്ത: ബി.ജെ.പി ദേശീയാധ്യക്ഷനും കേന്ദ്ര ആഭ്യന്തരമന്ത്രിയുമായ അമിത് ഷായുടെ സന്ദര്‍ശനത്തിനു മണിക്കൂറുകള്‍ക്കു മുന്‍പ് ബംഗാളില്‍ ബി.ജെ.പിക്കു തിരിച്ചടി. ബംഗാളിലെ നോര്‍ത്ത് 24 പര്‍ഗാനാസ് ജില്ലയിലുള്ള ഗരുലിയ മുനിസിപ്പാലിറ്റിയുടെ ഭരണം ബി.ജെ.പിക്കു നഷ്ടപ്പെട്ടു.
അവിശ്വാസ പ്രമേയത്തെത്തുടര്‍ന്നു സുനില്‍ സിങ് ചെയര്‍മാന്‍ സ്ഥാനം രാജിവെച്ചതോടെ തൃണമൂല്‍ കോണ്‍ഗ്രസ് തന്നെ വീണ്ടും മുനിസിപ്പാലിറ്റിയുടെ ഭരണമേറ്റെടുത്തു.
സുനില്‍ സിങ് ബി.ജെ.പി എം.പി അര്‍ജുന്‍ സിങ്ങിന്റെ ബന്ധുവാണ്. കുറച്ചുമാസങ്ങള്‍ക്കു മുന്‍പാണ് അദ്ദേഹം ബി.ജെ.പിയിലെത്തിയത്.
ലോക്‌സഭാ തെരഞ്ഞെടുപ്പിനുശേഷം ബി.ജെ.പിക്കു സംസ്ഥാനത്തെ തദ്ദേശ സ്വയംഭരണ സ്ഥാപനങ്ങളില്‍ കൃത്യമായ മേല്‍ക്കൈ ലഭിച്ചിരുന്നു. ഗരുലിയ അടക്കം ഏഴ് മുനിസിപ്പാലിറ്റികളിലാണ് അവര്‍ ഭരണത്തിലെത്തിയത്.
ഇതൊക്കെയും കൂറുമാറ്റത്തിലൂടെയെത്തിയ കൗണ്‍സിലര്‍മാരുടെ പിന്തുണയോടെയായിരുന്നു. എന്നാല്‍ കഴിഞ്ഞ രണ്ടുമാസത്തിനിടെ അര്‍ജുന്‍ സിങ്ങിന്റെ ശക്തികേന്ദ്രമായ ഭത്പര മുനിസിപ്പാലിറ്റി ഒഴികെയുള്ള ആറെണ്ണവും തൃണമൂലിന്റെ കൈകളില്‍ തിരിച്ചെത്തി.
ഇന്ന് വൈകിട്ടോടെയാണ് ദേശീയ പൗരത്വ രജിസ്റ്റര്‍ വിഷയത്തില്‍ സംസാരിക്കാന്‍ അമിത് ഷാ കൊല്‍ക്കത്തയിലെത്തുന്നത്.
