ഭക്ഷണപ്രേമികളെ ഈയടുത്തായി ഏറെ കൊതിപ്പിച്ച വിഭവമാണ് ഷെഫ് സുരേഷ് പിള്ളയുടെ ഫിഷ് നിര്‍വാണ. കൊല്ലം റാവിസില്‍ സുരേഷ് പിള്ളയുണ്ടാക്കിയ ഫിഷ് നിര്‍വാണയ്ക്ക് സമൂഹമാധ്യമങ്ങളില്‍ വലിയ സ്വീകാര്യതയാണ് ലഭിച്ചത്.
ഇപ്പോഴിതാ നടി അഹാന കൃഷ്ണയും നിര്‍വാണ രുചിച്ച് അഭിപ്രായം പറഞ്ഞിരിക്കുകയാണ്. ഇന്‍സ്റ്റഗ്രാം വീഡിയോയിലൂടെയും മറ്റും തന്നെ കൊതിപ്പിച്ച വിഭവം കഴിക്കാന്‍ കഴിഞ്ഞതില്‍ ഏറെ സന്തോഷമുണ്ടെന്ന് അഹാന വീഡിയോയില്‍ പറഞ്ഞു.
നല്ല രുചിയുള്ള വിഭവമായിരുന്നുവെന്നും അഹാന പറഞ്ഞു. ഈ വീഡിയോക്ക് താഴെ ചിലര്‍ വിമര്‍ശനവുമായെത്തിയിരുന്നു. പോസ്റ്റിന് താഴെ തെറിവിളികളുമായെത്തിയവര്‍ക്ക് ഷെഫ് സുരേഷ്പിള്ള നല്‍കിയ മറുപടി ഇങ്ങനെയാണ്.
‘ഭക്ഷണം കഴിച്ചതിന് ശേഷം ഇനിയല്പം രുചി കുറഞ്ഞാല്‍പോലും അതുണ്ടാക്കിയ ഷെഫിനെ വിളിച്ച് അഭിനന്ദിക്കുന്ന പല രാജ്യങ്ങളിലും ജോലി ചെയ്ത അനുഭവമുണ്ട്.
നമ്മുടെ നാട്ടില്‍ ഭക്ഷണമുണ്ടാക്കുന്നവരെ പണ്ടാരി, വെപ്പുകാരന്‍, കുശിനി, പാചകക്കാരന്‍ എന്നൊക്കെ കളിയാക്കി വിളിക്കുന്ന ഒരു കാലമുണ്ടായിരുന്നു( ഇപ്പോഴും) അതിനോടൊപ്പം കുറ്റപ്പെടുത്തലുകളും. ചെയ്യുന്ന തൊഴിലിനെ മറ്റുള്ള സഹജീവികള്‍ അംഗീകരിക്കുമ്പോള്‍ ഉണ്ടാകുന്ന സന്തോഷം ഹോട്ടല്‍ തൊഴിലാളികള്‍ക്ക് മാത്രമല്ല എല്ലാ മേഖലയിലും പണിയെടുക്കുന്നവര്‍ക്ക് ഉള്ളതാണ്.
