ടിപ്പിക്കല്‍ തമിഴ് സ്റ്റൈലിലുള്ള ചിത്രങ്ങളൊരുക്കി ഹിറ്റാക്കുന്ന താരമാണ് ശിവകാര്‍ത്തികേയന്‍. സ്ഥിരമായി ഒരേ റൂട്ട് പിടിച്ചിട്ടും തിയേറ്ററില്‍ ആളെ കേറ്റാനും നിര്‍മാതാവിന്റെ കൈകള്‍ ഭദ്രമാക്കാനും അദ്ദേഹത്തിനായിരുന്നു. എന്നാല്‍ ഒടുവില്‍ റിലീസ് ചെയ്ത പ്രിന്‍സ് പതിവ് രീതികളെയെല്ലാം തെറ്റിച്ചിരുന്നു. തിയേറ്ററില്‍ വന്‍പരാജയമാണ് പ്രിന്‍സിന് നേരിടേണ്ടി വന്നത്. നിരൂപകരും ചിത്രത്തിനെതിരെ കടുത്ത വിമര്‍ശനമുന്നയിച്ചു.
പ്രിന്‍സിന്റെ പരാജയത്തിന് പിന്നാലെ വിതരണക്കാര്‍ക്ക് നഷ്ടപരിഹാരം നല്‍കിയിരിക്കുകയാണ് ശിവകാര്‍ത്തികേയന്‍. നഷ്ടപരിഹാരമായി മൂന്ന് കോടി രൂപ എസ്.കെ വിതരണക്കാര്‍ക്ക് നല്‍കിയെന്ന് തമിഴ് മാധ്യമങ്ങള്‍ റിപ്പോര്‍ട്ട് ചെയ്യുന്നു. ഇതുകൂടാതെ ചിത്രത്തിന്റെ നിര്‍മാണ കമ്പനിയായ ശ്രീ വെങ്കടേശ്വര സ്റ്റുഡിയോസും മൂന്ന് കോടി നല്‍കിയിട്ടുണ്ട്. വിതരണക്കാര്‍ക്ക് 12 കോടിയുടെ നഷ്ടമാണ് ഉണ്ടായിരുന്നത്. നഷ്ടത്തിന്റെ അമ്പത് ശതമാനമാണ് നടനും നിര്‍മാണ കമ്പനിയും ചേര്‍ന്ന് തിരികെ നല്‍കിയത്.
