കൊച്ചി: മോഹന്‍ലാല്‍ നായകനായ ലൂസിഫറിന്റെ ടീസറിന് പുറമേ പ്രണവ് മോഹന്‍ലാല്‍ നായകനായ ഇരുപത്തിയൊന്നാം നൂറ്റാണ്ടിന്റെയും ട്രെയ്‌ലറും വരുന്നു. ലൂസിഫറിന്റെ ടീസര്‍ നടന്‍ മമ്മൂട്ടിയാണ് പുറത്തുവിടുന്നതെങ്കില്‍ ഇരുപത്തിയൊന്നാം നൂറ്റാണ്ടിന്റേത് പുറത്തുവിടുന്നത് ദുല്‍ഖര്‍ സല്‍മാനാണ്.
പതിമൂന്നാം തിയ്യതി രാവിലെ ഒമ്പത് മണിക്കാണ് ലൂസിഫര്‍ ടീസര്‍ പുറത്തുവിടുന്നത്. വൈകീട്ട് അഞ്ചുമണിക്കാണ് ഇരുപത്തിയൊന്നാം നൂറ്റാണ്ടിന്റെ ട്രെയ്‌ലര്‍ പുറത്തുവിടുന്നത്. അരുണ്‍ ഗോപിയാണ് ഇരുപത്തിയൊന്നാം നൂറ്റാണ്ട് സംവിധാനം ചെയ്യുന്നത് തിരക്കഥ നിര്‍വഹിക്കുന്നതും സംവിധായകന്‍ തന്നെയാണ്.
പുതുമുഖ നായിക റേച്ചല്‍ ഡാവിഡ് ആണ് സിനിമയിലെ മറ്റൊരു പ്രധാന വേഷം അവതരിപ്പിക്കുക.ടോമിച്ചന്‍ മുളകുപാടമാണ് ചിത്രം നിര്‍മ്മിക്കുന്നത്. മലയാളത്തിലെ ആദ്യ 150 കോടി ചിത്രം പുലിമുരുകന്‍, പോക്കിരി രാജ, രാമലീല തുടങ്ങിയ ഹിറ്റ് ചിത്രങ്ങളുടെ നിര്‍മ്മാതാവാണ് ടോമിച്ചന്‍.
മുരളി ഗോപി തിരക്കഥയെഴുതിയ ചിത്രം ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ലൂസിഫര്‍ നിര്‍മ്മിക്കുന്നത്. മോഹന്‍ലാലിന്റെ സഹോദരനായി ടൊവിനോയും മറ്റൊരു പ്രധാനപ്പെട്ട വേഷം ഇന്ദ്രജിത്തും കൈകാര്യം ചെയ്യും എന്നാണ് റിപ്പോര്‍ട്ടുകള്‍. പ്രധാനപ്പെട്ട സ്ത്രീ കഥാപാത്ര വേഷങ്ങളില്‍ മഞ്ജു വാരിയര്‍, മംമ്ത മോഹന്‍ദാസ്, സാനിയ ഇയ്യപ്പന്‍ എന്നിവരാണ് എത്തുന്നത്. വമ്പന്‍ താരനിര തന്നെയാണ് ചിത്രത്തില്‍ അണിനിരക്കുന്നത്.