തിരുവനന്തപുരം: നടിയെ അക്രമിച്ച കേസില്‍ ദിലീപ് പുറത്തിറങ്ങിയത് പ്രോസിക്യൂഷന്റെ പരാജയമാണോയെന്ന ചോദ്യം പലകോണില്‍ നിന്നും ഉയര്‍ന്നു കഴിഞ്ഞു. എന്നാല്‍ വെറും ജാമ്യമല്ല മറിച്ച് ഉപാധികളോടെയുള്ള ജാമ്യമാണ് ദിലീപിന് ലഭിച്ചതെന്നാണ് നിയമജ്ഞര്‍ ചൂണ്ടിക്കാട്ടുന്നത്.
മാതൃഭൂമി ന്യൂസില്‍ “ദിലീപ് പുറത്ത് ഇനി എന്ത്?” എന്ന വിഷയത്തില്‍ നടന്ന ചര്‍ച്ചയില്‍ പങ്കെടുത്ത അഡ്വ. അജകുമാര്‍ അവതാരകന്‍ വേണുവിന്റെ ചോദ്യത്തിന് നല്‍കിയ മറുപടിയും ഈ നിരീക്ഷണം തന്നെയായിരുന്നു.
അഞ്ച് ദിവസം കൂടിക്കഴിഞ്ഞ് ദിലീപ് കസ്റ്റഡിയില്‍ തുടരുകയാണെങ്കില്‍ 90 ദിനം പൂര്‍ത്തിയാകുന്നതോടെ പൊലീസ് കുറ്റപത്രം സമര്‍പ്പിച്ചില്ലെങ്കില്‍ സ്വാഭാവികമായും ദിലീപിന് നിരുപാധികം ജാമ്യം ലഭിക്കുമായിരുന്നു. ആ സമയത്ത് ഉപധികള്‍ വെക്കാന്‍ കോടതിക്ക് സാധിക്കുകയുമില്ല. എന്നാല്‍ ഇപ്പോള്‍ ജാമ്യം ലഭിച്ചിരിക്കുന്നത് ഉപാധികളോടെയാണ്. അത് ഒഴിവാക്കാനാണ് ഇപ്പോള്‍ ജാമ്യം നല്‍കിയിരിക്കുന്നത് എന്ന നീരീക്ഷണമാണ് അജകുമാര്‍ നടത്തിയത്.
ഇത്തവണ ജാമ്യഹര്‍ജി നല്‍കിയ ദിലീപ് സ്വാഭാവിക ജാമ്യമാണ് തേടിയിരുന്നതെങ്കിലും കര്‍ശന ഉപാധികളോടെയായിരുന്നു ഹൈക്കോടതി ജാമ്യം നല്‍കിയത്.
ദിലീപിന്റെ പാസ്പോര്‍ട്ട് അങ്കമാലി മജിസ്ട്രേറ്റ് കോടതിയില്‍ ഹാജരാക്കണമെന്നും രണ്ട് ആള്‍ജാമ്യത്തിലും 1 ലക്ഷം രൂപയുടെ ബോണ്ടിലുമായിരുന്നു കോടതി ജാമ്യം അനുവദിച്ചത്. അന്വേഷണ ഉദ്യോഗസ്ഥര്‍ ആവശ്യപ്പെടുമ്പോള്‍ ഹാജരാകണമെന്നും സാക്ഷികളെ സ്വാധീനിക്കാന്‍ ഒരു തരത്തിലും ശ്രമിക്കരുതെന്നും ജാമ്യവ്യവസ്ഥയില്‍ പറയുന്നുണ്ട്.