സ്‌കൂളില്‍ പഠിക്കുന്ന സമയം തൊട്ട് തന്റെ ക്രഷ് ഷാരൂഖ് ഖാനായിരുന്നുവെന്ന് നടി സ്വാസിക. ഷാരൂഖ് ഖാനെ നേരിട്ട് കണ്ടാല്‍ ഓടിപോയി കെട്ടിപ്പിടിക്കുമെന്നും സിനിമയില്‍ അദ്ദേഹത്തിന്റെ കൂടെ അഭിനയിക്കാന്‍ അവസരം തരുമോയെന്ന് ചോദിക്കുമെന്നും താരം പറഞ്ഞു.
മലയാള സിനിമയില്‍ ക്രഷ് തോന്നിയത് പൃഥ്വിരാജിനോടാണെന്നും നന്ദനം സിനിമ കണ്ടിട്ടായിരുന്നു ആദ്യം അങ്ങനെ തോന്നിയതെന്നും സ്വാസിക പറഞ്ഞു. കൂടാതെ സ്‌കൂളില്‍ വെച്ച് ഇഷ്ടം തോന്നിയ വ്യക്തിയെക്കുറിച്ചും സ്വാസിക സംസാരിച്ചു. മാറ്റിനി ലൈവിന് നല്‍കിയ അഭിമുഖത്തിലാണ് സ്വാസിക ഇക്കാര്യങ്ങള്‍ പറഞ്ഞത്.
”ഞാന്‍ രണ്ടിലും മൂന്നിലും പഠിക്കുന്ന സമയം തൊട്ടുള്ള എന്റെ ക്രഷ് ഷാരൂഖ് ഖാനാണ്. ചെറുപ്പത്തില്‍ അമ്മയും കുട്ടിയും കളിക്കുമ്പോള്‍ അതില്‍ എപ്പോഴും എന്റെ ഭര്‍ത്താവ് ഷാരൂഖ് ഖാനായിരിക്കും.
ആ ക്രഷ് എനിക്ക് ഇപ്പോഴും അദ്ദേഹത്തോടുണ്ട്. അദ്ദേഹത്തോട് എനിക്ക് വലിയ ആരാധനയാണ്. അദ്ദേഹം എന്റെ മുന്നിലേക്ക് വന്നാല്‍ ഞാന്‍ ചോദ്യം ചോദിക്കില്ല. ഓടിപോയി കെട്ടിപിടിക്കും. ചിലപ്പോള്‍ അദ്ദേഹത്തെ കിസ് ചെയ്യും. അല്ലെങ്കില്‍ കാല് തൊട്ട് വഴങ്ങും. കാല് തൊട്ട് വണങ്ങുന്നത് എന്റെ വീക്ക്‌നസാണ്.
