ഈ ചോദ്യം എന്നോടല്ല ചോദിക്കേണ്ടത്, സംവിധായകരോടാണ്; ഈയൊരു കമന്റ് കേട്ട് ഞാന്‍ മടുത്തു: ശിവദ

മഴ എന്ന ആല്‍ബത്തിലൂടെയും പിന്നീട് രഞ്ജിത് ശങ്കര്‍ ചിത്രം സു സു സുധി വാത്മീകത്തിലൂടെയും പ്രേക്ഷകരുടെ ഇഷ്ടം പിടിച്ചുപറ്റിയ നടിയാണ് ശിവദ.

മികച്ച നായികയാണെങ്കിലും അവസരങ്ങള്‍ കുറഞ്ഞ് പോയോ, എന്നുള്ള കമന്റിന് മറുപടി പറയുകയായിരുന്നു ഇപ്പോള്‍ താരം.

ബിഹൈന്‍ഡ്‌വുഡ്സ് ചാനലില്‍ പ്രേക്ഷകരുടെ സോഷ്യല്‍ മീഡിയ കമന്റുകള്‍ക്ക് മറുപടി പറയുകയായിരുന്നു ശിവദ.

”അത് സംവിധായകരോട് ചോദിക്കേണ്ടി വരും. ഈ ചോദ്യം എന്നോടല്ല ചോദിക്കേണ്ടത്. (ചിരി)

കാരണമെന്താണെന്ന് എനിക്കറിയില്ല. ഞാന്‍ ഒത്തിരി സോഷ്യല്‍ അല്ലേ എന്ന് ചിലപ്പോള്‍ എനിക്കും തോന്നാറുണ്ട്,” ശിവദ പറഞ്ഞു.

ശിവദ ഒരു അണ്ടര്‍റേറ്റഡ് നടിയാണ്, എന്ന കമന്റിനും അവര്‍ പരിപാടിയില്‍ മറുപടി നല്‍കുന്നുണ്ട്.

”ഇതിനും കാരണമെന്താണെന്ന് സംവിധായകരോട് തന്നെ പോയി ചോദിക്കണം. എന്നോട് ചോദിച്ചാല്‍ എനിക്കറിയില്ല.

എന്റെ എല്ലാ കാര്യങ്ങളും ഫാമിലിയുമായാണ് തുറന്ന് പറയാറുള്ളത്. കഴിഞ്ഞ ദിവസവും ഈയൊരു കമന്റ് വായിച്ചപ്പോള്‍ ഞാന്‍ മുരളിയുടെ അടുത്ത് സംസാരിച്ചിരുന്നു. ‘അണ്ടര്‍റേറ്റഡ് എന്നുള്ള ഈയൊരു വാക്ക് ഞാന്‍ കേട്ട് മടുത്തു മുരളീ,’ എന്ന് ഞാന്‍ പറഞ്ഞു.

കാരണം എനിക്കറിയില്ല. നേരത്തെ പറഞ്ഞത് പോലെ തന്നെ ഇതും സംവിധായകരോട് തന്നെ ചോദിക്കേണ്ടി വരുമെന്ന് തോന്നുന്നു.

ഐ ഹാവ് നോ ഐഡിയ. അറിയുകയാണെങ്കില്‍ എനിക്കും ഒന്ന് പറഞ്ഞ് തരണേ,” ശിവദ ചിരിച്ചുകൊണ്ട് കൂട്ടിച്ചേര്‍ത്തു.

ജീത്തു ജോസഫിന്റെ സംവിധാനത്തില്‍ മോഹന്‍ലാല്‍ നായകനായെത്തിയ 12th മാന്‍ ആണ് ശിവദയുടേതായി ഒടുവില്‍ റിലീസ് ചെയ്ത ചിത്രം. ഡിസ്നി പ്ലസ് ഹോട്സ്റ്റാറിലായിരുന്നു ചിത്രം റിലീസ് ചെയ്തത്.

ജയസൂര്യ- പ്രജേഷ് സെന്‍ കൂട്ടുകെട്ടില്‍ റിലീസ് ചെയ്ത മേരി ആവാസ് സുനോയാണ് ശിവദയുടെ ഏറ്റവുമൊടുവില്‍ പുറത്തുവന്ന തിയേറ്റര്‍ റിലീസ്. മഞ്ജു വാര്യറും ചിത്രത്തില്‍ ഒരു പ്രധാന കഥാപാത്രമായി എത്തുന്നുണ്ട്.

Content Highlight: Actress Sshivada reaction on the social media comment that she is an under rated actress who got less roles