ഒരു റിലേഷന്‍ഷിപ്പിനെ കുറിച്ചോ പാര്‍ട്ണറെ കുറിച്ചോ ഒന്നും താന്‍ ഇപ്പോള്‍ ചിന്തിക്കുന്നില്ലെന്നും നിലവില്‍ കരിയറില്‍ മാത്രമാണ് ഫോക്കസ് ചെയ്യുന്നതെന്നും പറയുകയാണ് നടി പ്രയാഗ മാര്‍ട്ടിന്‍.

സിനിമയില്‍ ഒരിടം ലഭിച്ച ശേഷം മാത്രമേ പാര്‍ട്ണറെ കുറിച്ചോ ബോയ് ഫ്രണ്ടിനെ കുറിച്ചോ ഒക്കെ ആലോചിക്കുന്നുള്ളൂവെന്നായിരുന്നു ബിഹൈന്‍ഡ് വുഡ്‌സിന് നല്‍കിയ അഭിമുഖത്തില്‍ പ്രയാഗ പറഞ്ഞത്.

‘ എന്നെ സംബന്ധിച്ച് പ്രണയം സിനിമയോടാണ്. എനിക്ക് തോന്നുന്നില്ല ആ പ്രണയം എന്നെങ്കിലും കെട്ടടങ്ങിപ്പോകുമെന്ന്. സിനിമയോടുള്ള പ്രണയം മനസിലാക്കാന്‍ പറ്റുന്ന ഒരാള്‍ക്കേ എന്റെ പാര്‍ട്ണര്‍ ആകാന്‍ പറ്റുള്ളൂ,’ പ്രയാഗ പറയുന്നു.

ഏതെങ്കിലും ഡേറ്റിങ് ആപ്പുകള്‍ ഉപയോഗിക്കുന്നുണ്ടോ എന്ന ചോദ്യത്തിന് ഇല്ലെന്നായിരുന്നു താരത്തിന്റെ മറുപടി. ഡേറ്റിങ് എന്ന ആശയത്തോടേ തനിക്ക് താത്പര്യമില്ലെന്നും പ്രയാഗ പറഞ്ഞു.

സ്വാഭാവികമായി അത് നടക്കുകയാണെങ്കില്‍ നടന്നോട്ടെ. നാച്ചുറല്‍ ബോണ്ടിങ് കെമിസ്ട്രിയാണ് എനിക്കിഷ്ടം. ഡേറ്റിങ്ങിന് വേണ്ടി ഒരു പാര്‍ട്ണറെ കണ്ടെത്തുന്നതിനോടോ, എന്തുകൊണ്ട് ഡേറ്റിങ് ആയിക്കൂടാ എന്ന് ചോദിച്ച് അതിലേക്ക് ഇറങ്ങുന്നതിനോടോ എനിക്ക് യോജിപ്പില്ല. എനിക്ക് അതില്‍ താത്പര്യമില്ലെന്ന് മാത്രമേയുള്ളൂ. അതിനോട് യോജിക്കുന്ന ഒരുപാട് പേരുണ്ടാകും. ഞാന്‍ പറയുന്നത് മാത്രമാണ് ശരിയെന്ന് പറയില്ല. എന്റെ ശരി മറ്റുള്ളവര്‍ക്ക് തെറ്റായിരിക്കും, പ്രയാഗ പറഞ്ഞു.