മലയാള സിനിമയില്‍ ഒരുപിടി മികച്ച കഥാപാത്രങ്ങളെ അവതരിപ്പിക്കാന്‍ ഭാഗ്യം ലഭിച്ച നടിയാണ് നിമിഷ സജയന്‍. 2017 ല്‍ പുറത്തിറങ്ങിയ തൊണ്ടിമുതലും ദൃക്‌സാക്ഷിയും എന്ന ചിത്രത്തിലൂടെയാണ് നിമിഷ മലയാളത്തിന്റെ വെള്ളിത്തിരയിലെത്തുന്നത്.
മുംബൈയില്‍ ജനിച്ചവളര്‍ന്ന നിമിഷയെ സംബന്ധിച്ച് മലയാള സിനിമയില്‍ ലഭിക്കാവുന്ന ഏറ്റവും മികച്ച തുടക്കം തന്നെയായിരുന്നു തൊണ്ടിമുതലിലേത്. ഈട, ഒരു കുപ്രസിദ്ധ പയ്യന്‍, ദി ഗ്രേറ്റ് ഇന്ത്യന്‍ കിച്ചണ്‍, മാലിക്, വണ്‍, ഇന്നലെ വരെ, ഹെവന്‍, ഒരു തെക്കന്‍ തല്ലുകേസ് തുടങ്ങി ഒരുപിടി മികച്ച സിനിമകളുടെ ഭാഗമാകാന്‍ തുടര്‍ന്നും നിമിഷയ്ക്ക് സാധിച്ചു. നിവിന്‍ പോളി നായകനായ രാജീവ് രവി ചിത്രം തുറമുഖമാണ് നിമിഷയുടേതായി ഏറ്റവും ഒടുവില്‍ പുറത്തിറങ്ങിയ ചിത്രം. മികച്ച പ്രകടനമാണ് ചിത്രത്തില്‍ താരം കാഴ്ചവെച്ചത്.
തൊണ്ടിമുതലും ദൃക്‌സാക്ഷിയും എന്ന ചിത്രത്തിലെ ശ്രീജ എന്ന കഥാപാത്രവും ഈടയിലെ അമ്മുവുമാണ് തനിക്ക് ഇത്രയും അവസരങ്ങള്‍ ഉണ്ടാക്കിത്തന്നതെന്ന് പറയുകയാണ് നിമിഷ. ഒപ്പം ഇതുവരെ താന്‍ അഭിനയിച്ച സിനിമകളില്‍ തനിക്ക് ഏറ്റവും ഇഷ്ടപ്പെട്ട കഥാപാത്രം ഏതാണെന്നും താരം സ്റ്റാര്‍ ആന്‍ഡ് സ്റ്റൈലിന് നല്‍കിയ അഭിമുഖത്തില്‍ പറയുന്നുണ്ട്.
ഇതുവരെ അഭിനയിച്ച സിനിമകളില്‍ തനിക്ക് ഏറ്റവും പ്രിയപ്പെട്ട കഥാപാത്രം ഈടയിലെ അമ്മു ആണെന്നാണ് നിമിഷ പറയുന്നത്. ആ സിനിമ എപ്പോള്‍ കാണുമ്പോഴും തന്റെ കണ്ണുനിറയുമെന്നും വ്യത്യസ്തമായ വൈകാരിക തലങ്ങളിലൂടെ സഞ്ചരിച്ച ഒരു കഥാപാത്രമാണ് അമ്മുവെന്നും താരം പറയുന്നു.
നിലവില്‍ മലയാള സിനിമയില്‍ തന്നെ കൂടുതല്‍ ശ്രദ്ധിക്കണമെന്നാണ് താന്‍ ആഗ്രഹിക്കുന്നതെന്നും മറ്റു ഭാഷകളില്‍ നിന്നും ഓഫറുകള്‍ വരുന്നുണ്ടെങ്കിലും അത് ഇപ്പോള്‍ സ്വീകരിക്കേണ്ടതില്ലെന്നാണ് തോന്നുന്നതെന്നും താരം പറഞ്ഞു.
ഞാന്‍ ആഗ്രഹിക്കുന്ന രീതിയിലുള്ള കഥാപാത്രങ്ങള്‍ മലയാളത്തില്‍ നിന്ന് ലഭിക്കുന്നുണ്ട്. ഇവിടുത്തെ അവസരങ്ങള്‍ പരമാവധി ഉപയോഗപ്പെടുത്തിയ ശേഷം മറ്റുഭാഷകളില്‍ പരീക്ഷണം നടത്താമെന്നാണ് കരുതുന്നതെന്നും താരം പറഞ്ഞു.
രാജീവ് രവി ചിത്രമായ തുറമുഖത്തിന് വേണ്ടി താന്‍ മട്ടാഞ്ചേരി ഭാഷ പഠിച്ചിരുന്നെന്നും മുന്‍പ് അത്തരത്തില്‍ ഒരു സിനിമയ്ക്ക് വേണ്ടി ഭാഷപഠിക്കുന്നത് മാലിക്കിനാണെന്നും അന്ന് തിരുവനന്തപുരം ഭാഷ പഠിച്ചെടുത്തെന്നും താരം പറഞ്ഞു. സിനിമയ്ക്ക് വേണ്ടി അത്തരത്തിലുള്ള ഹോം വര്‍ക്കുകള്‍ നടത്താന്‍ തനിക്ക് ഇഷ്ടമാണെന്നും നിമിഷ പറഞ്ഞു.
രണ്ട് വര്‍ഷത്തെ പരിശ്രമങ്ങള്‍ക്ക് ശേഷമാണ് മുംബൈ സ്വദേശിയായ നിമിഷ മലയാളം ഹൃദ്യസ്ഥമാക്കുന്നത്. മലയാളം വായിക്കാനും എഴുതാനുമറിയാത്ത താന്‍ മലയാള സിനിമയിലെത്തിയ ശേഷം മാത്രമാണ് ഭാഷ കൃത്യമായി പഠിച്ചെടുത്തതെന്നും താരം പറഞ്ഞു.
Content Highlight: Actress Nimisha Sajayan about her Favourite Character