കൊച്ചി: വ്യത്യസ്തമായ അഭിനയരീതിയിലൂടെ മലയാളത്തില്‍ തന്റേതായ ഇടം കണ്ടെത്തിയ നടിയാണ് നിഖില വിമല്‍. മമ്മൂട്ടി ചിത്രം ദി പ്രീസ്റ്റാണ് നിഖിലയുടെ ഏറ്റവുമടുത്ത് പുറത്തിറങ്ങിയ ചിത്രം.
ചിത്രത്തില്‍ മഞ്ജു വാര്യരോടൊപ്പം മികച്ച പ്രകടനമാണ് നിഖില കാഴ്ചവെച്ചത്. ഇപ്പോഴിതാ മഞ്ജു വാര്യരുമൊത്തുള്ള അനുഭവങ്ങള്‍ പങ്കുവെയ്ക്കുകയാണ് നിഖില. കേരളകൗമുദി ഓണ്‍ലൈനിന് നല്‍കിയ അഭിമുഖത്തിലാണ് നിഖില മനസ്സു തുറന്നത്.
വളരെ ലാളിത്യം നിറഞ്ഞ വ്യക്തിയാണ് മഞ്ജു വാര്യര്‍ എന്നാണ് നിഖില പറയുന്നത്. താനും തന്റെ ചേച്ചിയും തമ്മിലുള്ള ബന്ധം പോലെയല്ല പ്രിസ്റ്റീലെ ചേച്ചിയും അനുജത്തിയും തമ്മിലെന്നും നിഖില പറഞ്ഞു.
‘ലാളിത്യം നിറഞ്ഞ വ്യക്തിത്വമാണ് മഞ്ജു ചേച്ചിയുടേത്. ലൊക്കേഷനില്‍ തന്റെ മേക്കപ്പ് ആര്‍ട്ടിസ്റ്റുമാരെയോ സ്റ്റൈലിസ്റ്റിനെയോ ചേച്ചി കൊണ്ടുവന്നിരുന്നില്ല. സാരി ഉടുക്കാന്‍ സെറ്റിലെ സ്റ്റൈലിസ്റ്റുമാരാണ് ചേച്ചിയെ സഹായിച്ചത്. മഞ്ജു ചേച്ചിയോടൊപ്പം അഭിനയിക്കാന്‍ കഴിഞ്ഞതില്‍ ഏറെ സന്തോഷം,’ നിഖില പറഞ്ഞു.
