ചെന്നൈ: തെന്നിന്ത്യയിലെ ഒട്ടുമിക്ക ഭാഷകളിലും മികച്ച വേഷങ്ങള്‍ കൈകാര്യം ചെയ്ത നടിയാണ് മീന. സിനിമ ജീവിതത്തില്‍ 30 വര്‍ഷം പിന്നിട്ട മീന സൂപ്പര്‍ താരങ്ങളുടെ വരെ നായികയായെത്തി ആരാധകരെ അതിശയിപ്പിച്ച നടി കൂടിയാണ്.
ഇപ്പോഴിതാ അഭിനയത്തില്‍ കൂടുതല്‍ വ്യത്യസ്ത വരുത്താന്‍ ശ്രമിക്കുകയാണ് താനെന്ന് പറഞ്ഞിരിക്കുകയാണ് മീന. ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തിലാണ് മീനയുടെ പ്രതികരണം. നെഗറ്റീവ് റോളുകള്‍ ചെയ്യാനാണ് തനിക്ക് ഇപ്പോള്‍ താല്‍പ്പര്യമെന്നും മീന പറയുന്നു.
‘നെഗറ്റീവ് ടച്ചുള്ള ഒരു വില്ലത്തി കഥാപാത്രം ചെയ്യാന്‍ എനിക്ക് വളരെ ആഗ്രഹമുണ്ട്. സിനിമാ ആസ്വാദകരുടെ ചിന്താഗതി മാറിക്കൊണ്ടിരിക്കുകയാണ്. അതിനനുസരിച്ച് കഥാപാത്രങ്ങള്‍ തെരഞ്ഞെടുക്കേണ്ട സമയമായി. ആദ്യമൊക്കെ ഒരു കഥാപാത്രത്തെ തെരഞ്ഞെടുക്കുമ്പോള്‍ അത് നമുക്ക് ചീത്തപ്പേര് ഉണ്ടാക്കുമോ എന്നൊക്കെ ചിന്തിച്ചിരുന്നു. എന്നാല്‍ ഇപ്പോള്‍ പ്രേക്ഷകര്‍ കഥാപാത്രത്തെ കാണുന്ന രീതി ഒരുപാട് മാറിയിട്ടുണ്ട്,’ മീന പറഞ്ഞു.
അതുകൊണ്ട് കുറച്ച് വെല്ലുവിളികള്‍ നിറഞ്ഞ വ്യത്യസ്തമായി കഥാപാത്രങ്ങള്‍ ചെയ്യണമെന്നാണ് ഇപ്പോള്‍ ആഗ്രഹമെന്നും മീന പറയുന്നു.
