കമ്മട്ടിപാടത്തില്‍ ദുല്‍ഖറിന്റെ അമ്മയായി അഭിനയിച്ചതിന് ശേഷം തനിക്ക് അമ്മ വേഷങ്ങള്‍ മാത്രമാണ് ലഭിച്ചിരുന്നതെന്ന് നടി അഞ്ജലി നായര്‍. അഭിനയിക്കാന്‍ പറ്റില്ലെന്ന് പെട്ടെന്ന് ഡയറക്ടറോട് പറയാന്‍ തനിക്ക് കഴിഞ്ഞില്ലെന്നും 27ാം വയസില്‍ ദുല്‍ഖറിന്റെ അമ്മയായി അഭിനയിച്ചത് വലിയ വാര്‍ത്തയായി എന്നും താരം പറഞ്ഞു.
സുഹൃത്തുക്കളായിട്ടുള്ള ആളുകള്‍ വിളിക്കുമ്പോള്‍ ആദ്യം സീനുകള്‍ നോക്കാതെ താന്‍ അഭിനയിക്കാന്‍ പോയിരുന്നുവെന്നും പിന്നീട് വലിയ നടന്മാരെ വരെ അമ്മയാകാന്‍ വിളിക്കാന്‍ തുടങ്ങിയെന്നും അഞ്ജലി പറഞ്ഞു. ഇന്ത്യാഗ്ലിറ്റ്‌സ് മലയാളത്തിന് നല്‍കിയ അഭിമുഖത്തിലാണ് അഞ്ജലി ഇക്കാര്യങ്ങള്‍ പറഞ്ഞത്.
”കമ്മട്ടിപ്പാടത്തില്‍ ദുല്‍ഖറിന്റെ അമ്മയായതിന് ശേഷം എല്ലാരും അമ്മ റോളിലേക്ക് എന്നെ ടൈപ്പ് കാസ്റ്റ് ചെയ്യാന്‍ നോക്കിയിരുന്നു. എന്നാല്‍ എനിക്ക് അത് ആദ്യമൊന്നും ഫീല്‍ ചെയ്തിട്ടില്ല. ടീച്ചറായിട്ടും അഡ്വക്കേറ്റ് ആയിട്ടും ജഡ്ജി ആയിട്ടും എല്ലാം എന്നെ വിളിച്ചിട്ടുണ്ടായിരുന്നു.
പ്രതീക്ഷിക്കാതെയാണ് മൂന്നാമത്തെ ഷെഡ്യൂളില്‍ ദുല്‍ഖറിന്റെ അമ്മയായിട്ട് വന്നത്. ആദ്യത്തെ രണ്ട് കാലഘട്ടം മാത്രമായിരുന്നു ഞാന്‍ ചെയ്യേണ്ടിയിരുന്നത്. മൂന്നാമതും അതില്‍ പ്രായമുള്ള അമ്മ വേഷം ചെയ്യേണ്ട സാഹചര്യം വന്നു.
ആ സമയത്ത് എനിക്ക് എന്താണ് ചെയ്യേണ്ടതെന്ന് അറിയില്ലായിരുന്നു. കാരണം പെട്ടെന്ന് ഒരു ഡയറക്ടറുടെ അടുത്ത് എന്ത് പറയണമെന്ന് അറിയില്ലായിരുന്നു. ഒരു കഥാപാത്രത്തോടും നോ പറയുന്ന ആള്‍ അല്ലായിരുന്നു ഞാന്‍.
ആ സിനിമയില്‍ അഭിനയിച്ചപ്പോള്‍ അത് വലിയ ന്യൂസായി 27ാം വയസില്‍ ദുല്‍ഖറിന്റെ അമ്മയായി എന്ന രീതിയില്‍ കൊടുത്തു. പിന്നീട് അത് ഫോളോ ചെയ്ത് മഞ്ജു ചേച്ചിയുടെ ചെറുപ്പകാലം പിന്നെ ലാലേട്ടന്റെ ചെറുപ്പത്തിലെ അമ്മ അങ്ങനെ അമ്മ വേഷം മാത്രം കിട്ടാന്‍ തുടങ്ങി. അത് മാത്രമേ ചെയ്യുകയുള്ളു അല്ലെങ്കില്‍ അതിലാണ് ശ്രദ്ധ എന്ന രീതിയില്‍ വരാന്‍ തുടങ്ങി.
പിന്നെ അധിക ആളുകളും സുഹൃത്തുക്കളാണ് അവര്‍ വിളിക്കുമ്പോള്‍ ഞാന്‍ ഡയലോഗും സീന്‍സും ഒന്നും നോക്കാതെ പോയി ചെയ്യാന്‍ തുടങ്ങി. ദൃശ്യത്തില്‍ കണ്ടപ്പോള്‍ എല്ലാരും എന്നോടാണ് ചോദിക്കുന്നത് എന്താണ് പെട്ടെന്ന് വന്ന് പോകുന്നതെന്ന്. കൂടുതല്‍ ചെയ്യാത്തത് എന്താണെന്നൊക്കെ ചോദിച്ചു.
നമ്മളെ തേടിയെത്തുന്ന റോളുകള്‍ മാത്രമാണ് ചെയ്യാന്‍ പറ്റുന്നുള്ളു. എനിക്ക് ഇത് ചെയ്യണം എന്നൊന്നും പറഞ്ഞാല്‍ ആരും പരിഗണിക്കില്ല. ഒരു നടി മുന്നേ എന്റെ മുന്നില്‍ നിന്നും പറഞ്ഞിരുന്നു എനിക്ക് അഞ്ജലിയെ പോലെ ഫിലിമില്‍ ഒരു കരിയര്‍ വേണ്ടെന്ന്.
അത്തരം അവസരങ്ങള്‍ വരുമ്പോള്‍ എല്ലാവരോടും ഇക്കാര്യം പറയാറുണ്ടെന്ന് അവര്‍ ഞങ്ങളുടെ മുന്നില്‍ വെച്ച് പറഞ്ഞു. എന്റെ ഭര്‍ത്താവിനെ അത് വേദനിപ്പിച്ചു,” അഞ്ജലി പറഞ്ഞു.
CONTENT HIGHLIGHT:ACTRESS ANJALI NAIR ABOUT TYPE CASTING