സിനിമയിലേക്ക് മലയാളത്തില്‍ നിന്ന് ഓഫറുകള്‍ വരുന്നത് കുറവാണെന്ന് നടി അഭിരാമി. അന്യ ഭാഷകളില്‍ നിന്നാണ് കൂടുതലും അഭിനയിക്കാന്‍ വിളിക്കുന്നതെന്നും എന്തുകൊണ്ട് തന്നെ മലയാള സിനിമയിലേക്ക് വിളിക്കുന്നില്ലെന്ന് ചിന്തിക്കാറില്ലെന്നും അഭിരാമി പറഞ്ഞു.
എന്തുകൊണ്ട് ഒരു സിനിമയിലേക്ക് വിളിക്കുന്നെന്ന കാര്യത്തില്‍ ഫോക്കസ് ചെയ്യാനാണ് തനിക്ക് താത്പര്യമെന്ന് അഭിരാമി കൂട്ടിചേര്‍ത്തു. സുരേഷ് ഗോപിക്കും ബിജു മേനോനുമൊപ്പം അഭിനയിച്ച ‘ഗരുഡന്‍’ എന്ന പുതിയ സിനിമയുടെ ഭാഗമായി നടന്ന വാര്‍ത്ത സമ്മേളനത്തില്‍ സംസാരിക്കുകയായിരുന്നു അഭിരാമി.
‘മറ്റു ഭാഷകളില്‍ കുറച്ച് തിരക്കായി പോയി. പിന്നെ മലയാളത്തില്‍ വന്ന ചില ഓഫറുകള്‍ എനിക്കെടുക്കാന്‍ പറ്റാതെയുമായി. സത്യം പറഞ്ഞാല്‍ മലയാളത്തില്‍ നിന്ന് ഓഫറുകള്‍ വരുന്നത് കുറവാണ്. അന്യ ഭാഷകളില്‍ നിന്നാണ് കൂടുതലും വിളിക്കുന്നത്.
ഇങ്ങനെ ഒരു പ്രൊജക്റ്റ് വന്നപ്പോള്‍ വലിയ സന്തോഷമുണ്ടായിരുന്നു. അതുകൊണ്ടാണ് ഈ സിനിമയില്‍ അഭിനയിച്ചത്. ആളുകള്‍ എന്തുകൊണ്ട് എന്നെ മലയാള സിനിമയിലേക്ക് വിളിക്കുന്നില്ലെന്ന് ഞാന്‍ ചിന്തിക്കാറില്ല.
എന്നാല്‍ എന്തുകൊണ്ട് എന്നെ വിളിക്കുന്നെന്ന് ആലോചിക്കാറുണ്ട്. അതില്‍ ഫോക്കസ് ചെയ്യാനാണ് എനിക്ക് താത്പര്യം. എന്തുകൊണ്ട് വിളിക്കുന്നില്ലെന്ന കാര്യത്തില്‍ ഫോക്കസ് ചെയ്യാന്‍ താത്പര്യമില്ല.
