ജോജു ജോര്‍ജ് ആദ്യമായി സംവിധായകകുപ്പായമണിഞ്ഞ ചിത്രമാണ് പണി. മികച്ച പ്രതികരണങ്ങളുമായി മുന്നേറുന്ന ചിത്രത്തില്‍ നായികയായി എത്തിയത് അഭിനയയാണ്. സംസാരശേഷിയും കേള്‍വിശക്തിയുമില്ലാത്ത അഭിനയ ഇതിനോടകം 50ലധികം ചിത്രങ്ങളില്‍ അഭിനയിച്ചിട്ടുണ്ട്.
സിനിമയോട് അടങ്ങാത്ത പാഷനുള്ള അഭിനയയുടെ പ്രകടനത്തെ പലരും അഭിനന്ദിക്കുന്നുണ്ട്. മലയാളം ഉൾപ്പെടെ അഞ്ച് ഭാഷകളിൽ അഭിനയ ഭാഗമായിട്ടുണ്ട്. എ.ആർ.മുരുകദോസിന്റെ സംവിധാനത്തിൽ സൂര്യ നായകനായി എത്തി വലിയ ശ്രദ്ധ നേടിയ ചിത്രമായിരുന്നു ഏഴാം അറിവ്. ചിത്രത്തിൽ ബോധിധർമൻ എന്ന സൂര്യയുടെ കഥാപാത്രത്തിനോടൊപ്പം ഒരു പ്രധാന കഥാപാത്രമായി അഭിനയയും പ്രത്യക്ഷപ്പെടുന്നുണ്ട്.
ഏഴാം അറിവിൽ അഭിനയിക്കാൻ കഴിഞ്ഞത് വലിയൊരു ഭാഗ്യമാണെന്നും സിനിമയുടെ ലൊക്കേഷനിൽ എല്ലാവർക്കും വളരെ പോസിറ്റീവ് അപ്രോച്ചായിരുന്നുവെന്നും അഭിനയ പറയുന്നു. സൂര്യ എപ്പോഴും സപ്പോർട്ട് ചെയ്യുമായിരുന്നുവെന്നും ചെറിയ കഥാപാത്രമാണെങ്കിലും ആ സിനിമയിലേക്ക് വിളിച്ചപ്പോൾ വലിയ സന്തോഷം തോന്നിയെന്നും അഭിനയ പറഞ്ഞു. സില്ലി മോങ്ക്സ് മോളിവുഡിനോട് സംസാരിക്കുകയായിരുന്നു അഭിനയ.
‘ഏഴാം അറിവ് എന്ന സിനിമയിൽ അഭിനയിക്കാൻ അവസരം കിട്ടിയതിൽ എനിക്ക് വലിയ സന്തോഷം തോന്നിയിരുന്നു. എപ്പോഴും വളരെ പോസിറ്റീവായ രീതിയിലുള്ള അപ്രോച്ചായിരുന്നു ആ സെറ്റിൽ എല്ലാവരുടെ ഭാഗത്തും ഉണ്ടായിരുന്നത്.
സൂര്യ സാറിനെ കുറിച്ച് പറയുകയാണെങ്കിൽ. അദ്ദേഹത്തിന്റെ അഭിനയം തന്നെ വളരെ മികച്ചതായിരുന്നു. അദ്ദേഹം എപ്പോഴും നമ്മളെ സപ്പോർട്ട് ചെയ്യുമായിരുന്നു. സെറ്റിൽ എല്ലാവരും സൂര്യ സാറിനെ ഒരു ബഹുമാനത്തോടെയായിരുന്നു കണ്ടിരുന്നത്.
ചെറിയ വേഷമാണെങ്കിലും എന്നെ അതിലേക്ക് വിളിച്ചതിൽ വലിയ സന്തോഷം തോന്നി. കഥാപാത്രം ചെറുതോ വലുതോ എന്നുള്ളതിലല്ല ആ കഥാപാത്രം പ്രേക്ഷകർ ഓർത്തിരിക്കുന്നുണ്ടോ ഇല്ലയോ എന്നതാണ് പ്രധാനം. ഏഴാം അറിവ് എനിക്ക് കിട്ടിയ നല്ലൊരു സിനിമയാണ്,’അഭിനയ പറയുന്നു.
Content Highlight: Actress Abhinaya About Surya And Ezham Ariv Movie