സിബി മലയില്‍ സംവിധാനം ചെയ്ത എന്റെ വീട് അപ്പൂന്റേം എന്ന ചിത്രത്തിലൂടെ ബാലതാരമായി വെള്ളിത്തിരയില്‍ അരങ്ങേറ്റം കുറിച്ച താരമാണ് വിഷ്ണു ഉണ്ണികൃഷ്ണന്‍. അമൃതം, മായാവി, കഥ പറയുമ്പോള്‍, ബാച്ചിലര്‍ പാര്‍ട്ടി, അസുരവിത്ത്, കമ്മത്ത് ആന്‍ഡ് കമ്മത്ത് തുടങ്ങിയ സിനിമളില്‍ ചെറിയ വേഷങ്ങളിലെത്തിയ വിഷ്ണു ഇന്ന് മലയാള സിനിമയിലെ എണ്ണംപറഞ്ഞ നടന്മാരില്‍ ഒരാളാണ്.
അഞ്ചുവര്‍ഷം മുന്‍പ് നാദിര്‍ഷ സംവിധാനം ചെയ്ത കട്ടപ്പനയിലെ ഋത്വിക് റോഷന്‍ എന്ന ചിത്രത്തില്‍ എങ്ങനെയെങ്കിലും സിനിമയില്‍ കയറിപ്പറ്റാന്‍ ആഗ്രഹിക്കുന്ന കിച്ചു എന്ന കഥാപാത്രമായി വിഷ്ണു എത്തി. വിഷ്ണുവിന്റെ ആദ്യ നായക വേഷവും ഇതായിരുന്നു.
ഏറ്റവും ഒടുവില്‍ പുറത്തിറങ്ങിയ കൃഷ്ണന്‍കുട്ടി പണി തുടങ്ങി എന്ന ചിത്രത്തില്‍ ശക്തമായ കഥാപാത്രത്തെ അവതരിപ്പിച്ചും താരം പ്രേക്ഷക പ്രശംസ പിടിച്ചുപറ്റി.
സിനിമയില്‍ അഭിനയിക്കണമെന്ന് കുട്ടിക്കാലം മുതലേ ആഗ്രഹിച്ചിരുന്നെന്നും അവിടെ തന്നെ എത്തിപ്പെട്ടെന്നുമാണ് വിഷ്ണു പറയുന്നത്. പ്ലാനിങ്ങില്ലാതെയായിരുന്നു യാത്ര. സിനിമയില്‍ അഭിനയിക്കണമെന്ന് കുട്ടിക്കാലത്തേ ആഗ്രഹിച്ചിരുന്നു. നമ്മള്‍ എപ്പോഴും മുകളിലോട്ടാണല്ലോ നോക്കുന്നത്. അടുത്തത് എന്താണ് ചെയ്യാന്‍ കഴിയുക എന്ന് ആലോചിച്ചിട്ടുണ്ട്.
ഒരു ഡയലോഗ് കിട്ടാന്‍ കൊതിച്ചു. കിട്ടിയപ്പോള്‍ മുഴുനീള വേഷം വേണമെന്ന് ആഗ്രഹം. അപ്പോള്‍ തോന്നും നായകനാകണമെന്ന്. നായകനായി കഴിയുമ്പോള്‍ അടുത്ത ചുവടുവെപ്പ് വേണമെന്നും, വിഷ്ണു പറയുന്നു.
സിനിമ വരുമ്പോള്‍ ചെയ്യുകയാണെന്നും അല്ലാതെ ഇന്ന രീതിയില്‍ ഒരു സിനിമ ചെയ്യണമെന്ന തരത്തിലേക്കൊന്നും വളര്‍ന്നിട്ടില്ലെന്നും വിഷ്ണു പറയുന്നു. പ്രഗത്ഭരായ സംവിധായകരുടെ വിളി വരുമ്പോള്‍ തന്നെ സന്തോഷമാണ്. ‘റെഡ്‌റിവറി’ലൂടെ ആദ്യമായി സമാന്തര സിനിമയുടെ ഭാഗമാകാന്‍ കഴിഞ്ഞു. അശോക് ആര്‍ നാഥ് ദേശീയ അവാര്‍ഡ് ലഭിച്ച സംവിധായകനാണ്. അദ്ദേഹത്തിന്റെ സിനിമയില്‍ അഭിനയിച്ചപ്പോള്‍ കുറേ കാര്യങ്ങള്‍ പഠിക്കാന്‍ കഴിഞ്ഞു, വിഷ്ണു പറയുന്നു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Actor Vishnu Unnikrishnan About His Cinema Career
