സൗബിന്‍ ഷഹീര്‍ സംവിധാനം ചെയ്ത് 2017ല്‍ പുറത്തിറങ്ങിയ ചിത്രമാണ് പറവ. ചിത്രത്തിലെ ഒരു പ്രധാന കഥാപാത്രം ദുല്‍ഖര്‍ സല്‍മാനായിരുന്നു അവതരിപ്പിച്ചത്. സിനിമയുടെ കാര്യം ദുല്‍ഖറിനോട് പറഞ്ഞിരുന്നുവെന്നും അഞ്ച് മിറ്റിട്ട് ആണെങ്കിലും ചിത്രത്തില്‍ താന്‍ അഭിനയിക്കുമെന്ന് ദുല്‍ഖര്‍ പറഞ്ഞതിനെക്കുറിച്ച് പറയുകയാണ് സൗബിന്‍.
ദുല്‍ഖര്‍ ചെയ്യേണ്ട കഥാപാത്രത്തെക്കുറിച്ച് സിനിമ ചെയ്യുന്നതിന് മുമ്പ് അദ്ദേഹം അറിഞ്ഞിട്ടില്ലായിരുന്നുവെന്നും വെറും അഞ്ച് മിനിറ്റിലേക്ക് ഏത് ചെറിയ റോള്‍ ആയാലും താന്‍ വന്ന് അഭിനയിക്കുമെന്നായിരുന്നു ദുല്‍ഖര്‍ പറഞ്ഞതെന്നും സൗബിന്‍ പറഞ്ഞു.
സിനിമയില്‍ ദുല്‍ഖറിന്റെ കഥാപാത്രത്തെക്കുറിച്ച് ഒരു ഡീറ്റെയിലിങ്ങും ഇല്ലെന്നും സൗബിന്‍ പറഞ്ഞു. ദുല്‍ഖറിനെക്കുറിച്ച് സൗബിന്‍ സംസാരിക്കുന്ന പഴയൊരു അഭിമുഖമാണ് ഇപ്പോള്‍ അദ്ദേഹത്തിന്റെ ആരാധകര്‍ക്കിടയില്‍ ചര്‍ച്ചയാകുന്നത്.
”അഞ്ച് മിനിട്ട് ആണെങ്കില്‍ പോലും ഈ പടത്തില്‍ വന്ന് അഭിനയിക്കുമെന്നായിരുന്നു ദുല്‍ഖര്‍ പറഞ്ഞത്. ചെയ്യേണ്ട കഥാപാത്രത്തെക്കുറിച്ച് ഈ സിനിമയില്‍ അദ്ദേഹം ഒന്നും കേട്ടിട്ടില്ല. അഭിനയിക്കേണ്ട അന്ന് വന്നിട്ടാണ് എന്നോട് എന്താണ് ചെയ്യേണ്ടതെന്ന് ചോദിച്ചത്.
വെറുതെ ക്ലബില്‍ ഇരുന്ന് കളിക്കുന്ന പയ്യനാണെങ്കില്‍ പോലും ഞാന്‍ ചെയ്യുമെന്ന് പറഞ്ഞാണ് അന്ന് സെറ്റില്‍ ഇരുന്നത്. സംസാരിച്ച് വന്നപ്പോഴാണ് ഇങ്ങനെ ഒരു കഥാപാത്രം ചെയ്യാമെന്ന് തീരുമാനിച്ചത്. അത് ഞാന്‍ ചെയ്യാമെടാ, എനിക്ക് കുഴപ്പമില്ലെന്ന് എന്നോട് പറഞ്ഞു.
ഈ സിനിമയില്‍ ദുല്‍ഖറിന്റെ വീടോ, ഫാമിലിയോ ഒന്നും കാണിക്കുന്നില്ല. അദ്ദേഹം എല്ലാ വീട്ടിലും ഉണ്ട്. എല്ലാവരെയും ഹെല്‍പ്പ് ചെയ്യുന്നുണ്ട്. ദുല്‍ഖറിനെക്കുറിച്ച് ഈ സിനിമയില്‍ ഒന്നും പറയുന്നില്ല,” സൗബിന്‍ പറഞ്ഞു.
അയല്‍വാശിയാണ് സൗബിന്റെ ഏറ്റവും പുതിയ ചിത്രം. നവാഗതനായ ഇര്‍ഷാദ് പരാരിയാണ് സംവിധായകന്‍. പെരുന്നാള്‍ റിലീസായി ഏപ്രില്‍ 21-ന് സിനിമ പ്രദര്‍ശനത്തിന് എത്തും. ബിനു പപ്പു,നസ്ലിന്‍ നിഖില വിമല്‍ എന്നിവരാണ് മറ്റ് പ്രധാന കഥാപാത്രങ്ങളാകുന്നത്.
content highlight: actor soubin shair about dulquer salmaan