കൊച്ചി: താന്‍ സാമ്പത്തിക പ്രതിസന്ധിയിലാണെന്നും സിനിമയില്‍ അവസരം കുറഞ്ഞെന്നുമുള്ള പ്രചരണങ്ങള്‍ക്കെതിരെ നടന്‍ രാഘവന്‍. ഇത്തരം പ്രചരണങ്ങള്‍ തെറ്റാണെന്നും ആരുടേയും കാരുണ്യത്തിലല്ല താന്‍ ജീവിക്കുന്നതെന്നും രാഘവന്‍ പറഞ്ഞു.
മാതൃഭൂമി ഡോട്ട്കോമിനോടായിരുന്നു അദ്ദേഹത്തിന്റെ പ്രതികരണം.
രാഘവനടക്കമുള്ള താരങ്ങള്‍ ഇന്നത്തെ കാലത്തെ സിനിമയില്‍ വേഷമില്ലാതെ ബുദ്ധിമുട്ടുകയാണെന്നും അവരെ പരിഗണിക്കണമെന്നും ഒരു നിര്‍മാതാവ് കഴിഞ്ഞ ദിവസം പറഞ്ഞിരുന്നു.
‘വ്യാജ പ്രചരണങ്ങളില്‍ കടുത്ത വിഷമമുണ്ട്. ആരുടെയും കാരുണ്യത്തിലല്ല ജീവിക്കുന്നത്. ജീവിതത്തില്‍ ഒരുപാട് പ്രതിസന്ധികള്‍ ഉണ്ടായിട്ടുണ്ടെങ്കിലും അതെല്ലാം തരണം ചെയ്യാന്‍ സാധിച്ചു. ഈ പ്രായത്തിലും ഞാന്‍ ജോലി ചെയ്യുന്നു. എന്റെ മക്കളെപ്പോലും ഞാന്‍ എന്റെ കാര്യങ്ങള്‍ക്കായി ആശ്രയിക്കാറില്ല,’ രാഘവന്‍ പറഞ്ഞു.
നിലവില്‍ തെലുങ്കില്‍ പ്രഭാസിനൊപ്പം ഒരു സിനിമ ചെയ്യുന്നുണ്ട്. പ്രഭാസിന്റെ മുത്തച്ഛന്റെ വേഷത്തിലാണ് അഭിനയിക്കുന്നത്. വിനയന്റെ പത്തൊന്‍പതാം നൂറ്റാണ്ടിലും അഭിനയിച്ചു.
