കൊച്ചി: ഹോം സിനിമയെ അഭിനന്ദിച്ച് നടന്‍ മോഹന്‍ലാല്‍. സിനിമയിലെ പ്രധാനവേഷത്തില്‍ എത്തിയ നടനും സംവിധായകനുമായ ശ്രീകാന്ത് മുരളിയാണ് ലാലേട്ടന്റെ വാട്ട്‌സാപ്പ് സന്ദേശം സോഷ്യല്‍ മീഡിയ വഴി പങ്ക് വെച്ചിരിക്കുന്നത്.
‘ഹോം കണ്ടു. വിളിച്ച് അഭിനന്ദിക്കുവാന്‍ ശ്രമിച്ചിട്ട് കിട്ടിയില്ല. വളരെ മികച്ച സിനിമ. ഇനിയും ഇത് തുടരുക’ എന്നാണ് മോഹന്‍ലാല്‍ വാട്‌സാപ്പ് സന്ദേശം അയച്ചിരിക്കുന്നത്.
നേരത്തെ ചിത്രത്തിന് അഭിനന്ദനവുമായി സംവിധായകരായ പ്രിയദര്‍ശന്‍, ഏ ആര്‍ മുരുഗദോസ് എന്നിവര്‍ എത്തിയിരുന്നു. മഹാമാരിക്കാലത്ത് താന്‍ കണ്ട ഏറ്റവും മികച്ച അഞ്ച് ചിത്രങ്ങളിലൊന്നാണെന്നാണ് ഹോം എന്നായിരുന്നു പ്രിയദര്‍ശന്‍ പറഞ്ഞത്.
ഹോമിനെ അഭിനന്ദിച്ചുകൊണ്ട് പ്രിയദര്‍ശന്‍ അയച്ച ടെക്സ്റ്റ് മെസേജ് ചിത്രത്തിന്റെ നിര്‍മാതാവായ വിജയ് ബാബുവാണ് സമൂഹമാധ്യമങ്ങള്‍ വഴി പങ്കുവെച്ചത്. ഈ അഭിനന്ദനം തന്നെ ഏറെ സന്തോഷവാനാക്കിയെന്നാണ് വിജയ് ബാബു പറഞ്ഞു.
ആഗസ്റ്റ് 19നാണ് ആമസോണ്‍ പ്രൈമില്‍ ഹോം റിലീസ് ചെയ്തത്. റോജിന്‍ തോമസ് തിരക്കഥ എഴുതി സംവിധാനം ചെയ്ത ചിത്രത്തില്‍ ഇന്ദ്രന്‍സായിരുന്നു കേന്ദ്ര കഥാപാത്രത്തെ അവതരിപ്പിച്ചത്.
മഞ്ജു പിള്ള, കൈനകരി തങ്കരാജ്, ശ്രീനാഥ് ഭാസി, നസ്ലന്‍, ദീപ തോമസ് എന്നിവരായിരുന്നു ചിത്രത്തിലെ മറ്റു പ്രധാന കഥാപാത്രങ്ങളെ അവതരിപ്പിച്ചത്.
സാങ്കേതികവിദ്യയുടെ വികാസവും സോഷ്യല്‍ മീഡിയയുടെ അതിപ്രസരവും ജനറേഷന്‍ ഗ്യാപ്പും പ്രമേയമാക്കിയാണ് ചിത്രം ഒരുക്കിയിരിക്കുന്നത്. മനുഷ്യബന്ധങ്ങളും കുടുംബവും മക്കളും മാതാപിതാക്കളും തമ്മിലുള്ള വൈകാരിക അടുപ്പവും അകലവും തുടങ്ങി നിരവധി വിഷയങ്ങള്‍ സിനിമയില്‍ കടന്നുവന്നിരുന്നു.
സിനിമയില്‍ ഒലിവര്‍ ട്വിസ്റ്റെന്ന സാധാരണക്കാരനായ കുടുംബനാഥനെ അവതരിപ്പിച്ച ഇന്ദ്രന്‍സ് ഗംഭീരമായ പ്രകടനമാണ് കാഴ്ചവെച്ചത്. ഒലിവര്‍ ട്വിസ്റ്റിന്റെ ഭാര്യയായ കുട്ടിയമ്മയെ സ്വാഭാവികതയോടെ അവതരിപ്പിച്ച മഞ്ജു പിള്ളയും വലിയ അഭിനന്ദനങ്ങള്‍ നേടിയിരുന്നു.
ശ്രീനാഥ് ഭാസിയുടെ ആന്റണിയും നസ്ലന്റെ ചാള്‍സും കൈനകരി തങ്കരാജിന്റെ അപ്പാപ്പന്‍ കഥാപാത്രവും ശ്രദ്ധ നേടിയിരുന്നു.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Actor Mohanlal praises home Malayalam Movie; Actor Srikanth Murali sharing the message