തിരുവനന്തപുരം: കോണ്‍ഗ്രസിന്റെ ഇന്ധനവില വര്‍ധനവിനെതിരായ സമരവും നടന്‍ ജോജു ജോര്‍ജിന്റെ പ്രതിഷേധവും വിവാദമായ സാഹചര്യത്തില്‍ സംഭവത്തില്‍ പ്രതികരണവുമായി ഡി.വൈ.എഫ്.ഐ. ജനങ്ങളെ പരമാവധി ഉപദ്രവിക്കാത്ത രീതിയിലാവണം സമരമെന്ന് ഡി.വൈ.എഫ്.ഐ. അഖിലേന്ത്യ അധ്യക്ഷന്‍ എ.എ. റഹീം പറഞ്ഞു
പ്രതിഷേധങ്ങളില്‍ ജനങ്ങളുടെ സഹകരണവും ആവശ്യമാണെന്നും അദ്ദേഹം കൂട്ടിച്ചേര്‍ത്തു. മീഡിയ വണ്ണിനോടായിരുന്നു അദ്ദേഹത്തിന്റെ പ്രതികരണം.
അതേസമയം ജോജു ജോര്‍ജിന്റെ കാര്‍ അടിച്ചു തകര്‍ത്ത നടപടി കോണ്‍ഗ്രസിന്റെ ധിക്കാരമാണെന്നും റഹീം പറഞ്ഞു.
‘കെ.സുധാകരന്റെ കാര്‍മികത്വത്തില്‍ കോണ്‍ഗ്രസ് ഒരു ഗുണ്ടാ സംഘമായി മാറിയിരിക്കുന്നതിന്റെ നേര്‍സാക്ഷ്യമാണ് ഇന്ന് കൊച്ചിയില്‍ കണ്ടത്,’ റഹീം പറഞ്ഞു.
ഇന്ധന വിലവര്‍ധനക്കെതിരെ സമരം ചെയ്യാനുള്ള രാഷ്ട്രീയവും ധാര്‍മികവുമായ അവകാശം കോണ്‍ഗ്രസിനില്ലെന്നും കോണ്‍ഗ്രസ് രാജ്യം ഭരിക്കുമ്പോള്‍ ഇന്ധന വില നിര്‍ണയാധികാരം കമ്പനികള്‍ക്ക് നല്‍കിയത് കാരണമാണ് വില അടിക്കടി കൂടുന്നതെന്നും റഹീം കുറ്റപ്പെടുത്തി.
‘ഇന്ധന വിലവര്‍ധന ഒരു പ്രധാനപ്പെട്ട പ്രശ്‌നമാണ്. ഏത് ജനകീയ വിഷയമുയര്‍ത്തിയുള്ള സമരമാണെങ്കിലും ശരി അത് പരമാവധി ജനങ്ങള്‍ക്ക് ബുദ്ധിമുട്ട് കുറച്ച് നടത്താനുള്ള ഉത്തരവാദിത്തം അത് നടത്തുന്ന രാഷ്ട്രീയ പാര്‍ട്ടികള്‍ക്കുണ്ട്,’ റഹീം പറഞ്ഞു.
പെട്രോള്‍ വിലവര്‍ധനവില്‍ ദേശീയപാത സ്തംഭിപ്പിച്ചുകൊണ്ടുള്ള കോണ്‍ഗ്രസിന്റെ സമരത്തിനെതിരെ ജോജു ജോര്‍ജ് പ്രതിഷേധിച്ചിരുന്നു.
മണിക്കൂറുകളോളം നീണ്ടുനിന്ന സമരത്തില്‍ നൂറുകണക്കിന് വാഹനങ്ങളായിരുന്നു വഴിയില്‍ കുടുങ്ങിക്കിടങ്ങിയത്. ആറ് കിലോമീറ്ററില്‍ അധികമുള്ള ദേശീയപാത സ്തംഭിപ്പിച്ചുകൊണ്ടായിരുന്നു കോണ്‍ഗ്രസിന്റെ പ്രതിഷേധം.
തന്റെ പ്രതിഷേധം ഒരു രാഷ്ട്രീയ പാര്‍ട്ടിക്ക് വേണ്ടി ചെയ്ത പരിപാടിയല്ലെന്നും ജോജു ജോര്‍ജ് പറഞ്ഞിരുന്നു. സഹികെട്ടാണ് പ്രതികരിച്ചതെന്നും അദ്ദേഹം പറഞ്ഞു.
അതേസമയം പ്രതിഷേധിച്ച നടന്‍ ജോജു ജോര്‍ജ് ക്രിമിനലാണെന്നും തറഗുണ്ടയാണെന്നും സുധാകരന്‍ അധിക്ഷേപിച്ചിരുന്നു. ജോജുവിന്റെ വാഹനം തകര്‍ത്തതിനെ ന്യായീകരിച്ചുകൊണ്ടായിരുന്നു സുധാകരന്‍ രംഗത്തെത്തിയത്.
വാഹനം തകര്‍ക്കാനുള്ള അവസരം ഉണ്ടാക്കിയത് അവരല്ലേ എന്നായിരുന്നു സുധാകരന്റെ ചോദ്യം. സമരക്കാര്‍ക്ക് നേരെ ചീറിപ്പാഞ്ഞതുകൊണ്ടാണ് വാഹനം തകര്‍ത്തത്. അല്ലെങ്കില്‍ എത്രയോ വാഹനങ്ങള്‍ അവിടെ നിന്നിട്ടില്ലേ.
മറ്റേതെങ്കിലും വാഹനത്തിന്റെ ചില്ല് പൊളിഞ്ഞോ, അക്രമം കാട്ടിയ അക്രമിയുടെ വാഹനം തകര്‍ത്തെങ്കില്‍ അതൊരു ജനരോഷത്തിന്റെ ഭാഗമല്ലേ, സ്വാഭാവികമല്ലേ, അതിലെന്തിരിക്കുന്നുവെന്നായിരുന്നു അദ്ദേഹത്തിന്റെ ചോദ്യം.
ഡൂള്‍ന്യൂസിന്റെ സ്വതന്ത്ര മാധ്യമപ്രവര്‍ത്തനത്തെ സാമ്പത്തികമായി സഹായിക്കാന്‍ ഇവിടെ ക്ലിക്ക് ചെയ്യൂ
ഡൂള്‍ന്യൂസിനെ ടെലഗ്രാം, വാട്‌സാപ്പ് എന്നിവയിലൂടേയും ഫോളോ ചെയ്യാം
Content Highlight: Actor Joju George DYFI Supports