കൊച്ചി: എം.ടിയുടെ ജന്മദിനത്തോടനുബന്ധിച്ച് നടന്ന മനോരഥങ്ങള്‍ ആന്തോളജി സീരിസിന്റെ ട്രെയ്ലര്‍ ലോഞ്ച് വേദിയില്‍ നടന്‍ ആസിഫ് അലിയെ സംഗീത സംവിധായകന്‍ രമേശ് നാരായണന്‍ അപമാനിച്ച സംഭവത്തില്‍ ആസിഫ് അലിക്ക് പിന്തുണയുമായി നടന്‍ ധ്യാന്‍ ശ്രീനിവാസന്‍.
രമേശ് നാരായണന്‍ ആദ്യം സ്വയം ന്യായീകരിക്കാന്‍ ശ്രമിച്ചെന്നും ആസിഫിന് കൈ കൊടുത്തിരുന്നു എന്നൊക്കെ പറഞ്ഞത് തെറ്റാണെന്നും ധ്യാന്‍ പറഞ്ഞു. അദ്ദേഹം പറഞ്ഞ ക്ഷമയില്‍ ആത്മാര്‍ത്ഥതയുണ്ടെന്ന് തോന്നിയില്ലെന്നും ധ്യാന്‍ പ്രതികരിച്ചു.
എല്ലാവരും ഇത് കാണുകയല്ലേ. ആസിഫിനെ പോലുള്ള ഒരാളെ ഇദ്ദേഹം അവഗണിക്കുകയാണ്. ആസിഫിന്റെ തോളില്‍ തട്ടിയെന്ന് ആദ്യം പറഞ്ഞു. അത് പച്ചക്കള്ളമല്ലേ. രാത്രിയായപ്പോഴേക്ക് പണി പാളിയെന്ന് മനസിലായപ്പോള്‍ സോറി പറഞ്ഞു. ഒരു കാര്യം ചെയ്ത് പിന്നീട് സോറി പറഞ്ഞിട്ടൊന്നും കാര്യമില്ല. ചെയ്തത് തെറ്റ് തന്നെയാണ്. ആസിഫ് ഒരു ചെറിയ ചിരിയോടെ അത് അവസാനിപ്പിച്ചു. പുള്ളി പിന്നീട് സോറിയൊക്കെ പറഞ്ഞു. ആ സോറിയൊന്നും മനസില്‍ നിന്ന് പറഞ്ഞതായി തോന്നിയില്ല,’ ധ്യാന്‍ പറഞ്ഞു.
അതേസമയം വിഷയത്തില്‍ രമേശ് നാരായണനോട് വിശദീകരണം തേടിയെന്ന് ഫെഫ്ക്ക പറഞ്ഞു. വിവേകത്തോടെയും പക്വതയോടെയും അദ്ദേഹം പെരുമാറണമായിരുന്നെന്നും പ്രായത്തില്‍ കവിഞ്ഞ പക്വത ആസിഫ് കാണിച്ചെന്നും ആസിഫിനെ ചേര്‍ത്ത് നിര്‍ത്തുന്നുവെന്നായിരുന്നു ബി. ഉണ്ണികൃഷ്ണന്‍ പറഞ്ഞത്.
