'മിര്‍സാപുര്‍' താരം ബ്രഹ്‌മ മിശ്രയെ മുംബൈയിലെ വീട്ടില്‍ മരിച്ച നിലയില്‍ കണ്ടെത്തി; മൃതദേഹം കണ്ടെത്തിയത് മരിച്ച് മൂന്ന് ദിവസത്തിന് ശേഷം
എന്റര്‍ടെയിന്‍മെന്റ് ഡെസ്‌ക്
Thursday, 2nd December 2021, 10:04 pm
മുംബൈ: ത്രില്ലര്‍ വെബ്‌സീരീസ് മിര്‍സാപുരില്‍ അഭിനയത്തിലൂടെ ശ്രദ്ധേയനായ നടന്‍ ബ്രഹ്‌മ മിശ്രയെ മുംബൈയിലെ വീട്ടില്‍ മരിച്ച നിലയില്‍ കണ്ടെത്തി. മുംബൈയിലെ വെര്‍സോവയിലുള്ള അപ്പാര്‍ട്ട്‌മെന്റില്‍ നിന്നും വ്യാഴാഴ്ച ഉച്ചതിരിഞ്ഞ് മൃതദേഹം കണ്ടെത്തുകയായിരുന്നെന്ന് പൊലീസ് പറഞ്ഞു.
36 വയസായിരുന്നു. വീട്ടിലെ ബാത്‌റൂമിന്റെ നിലത്തായിട്ടാണ് മൃതദേഹം കണ്ടെത്തിയത്. മിശ്ര വീട്ടില്‍ ഒറ്റയ്ക്കായിരുന്നു താമസിച്ചിരുന്നത്.
മരിച്ച് മൂന്ന് ദിവസത്തിന് ശേഷമാണ് മൃതദേഹം പൊലീസ് കണ്ടെത്തിയത്. അടുത്ത അപ്പാര്‍ട്ട്‌മെന്റുകളില്‍ താമസിക്കുന്നവര്‍ മിശ്രയുടെ അപ്പാര്‍ട്ട്‌മെന്റില്‍ നിന്നും ദുര്‍ഗന്ധം വമിച്ചതിനെത്തുടര്‍ന്ന് പൊലീസിനെ വിവരമറിയിക്കുകയായിരുന്നു.
മൃതദേഹം പോസ്റ്റ്‌മോര്‍ട്ടത്തിനായി അയച്ചിട്ടുണ്ട്. അപ്പാര്‍ട്ട്‌മെന്റ് പുറത്ത് നിന്ന് പൂട്ടിയ നിലയിലായിരുന്നുവെന്നും പൊലീസ് പറഞ്ഞു.
