പാലക്കാട്: പാമ്പാടി നെഹ്‌റു കോളേജില്‍ ജിഷ്ണു പ്രണോയിയുടെ “കൊലപാതക”ത്തിനെതിരെ പ്രതിഷേധിച്ച വിദ്യാര്‍ത്ഥികളോട് പ്രതികാര നടപടിയുമായി കോളേജ് മാനേജ്‌മെന്റ്. വിദ്യാര്‍ത്ഥികള്‍ക്ക് മതിയായ ഹാജരും ഇന്റേണല്‍ മാര്‍ക്കും ഇല്ലെന്ന കാരണം ചൂണ്ടിക്കാട്ടി സമരത്തില്‍ പങ്കെടുത്ത 65 വിദ്യാര്‍ത്ഥികളെയാണ് പരീക്ഷ എഴുതുന്നതില്‍ നിന്ന് വിലക്കിയിരിക്കുന്നത്.
മാനേജ്‌മെന്റിനെതിരെ പ്രതികരിച്ചതിനാലാണ് പരീക്ഷ എഴുതാന്‍ അനുവദിക്കാത്തതെന്നാണ് വിദ്യാര്‍ത്ഥികള്‍ പറയുന്നത്. ജൂണ്‍ മാസം അവസാനം പരീക്ഷ നടക്കാനിരിക്കെയാണ് മാനേജ്‌മെന്റിന്റെ നടപടി. അടുത്ത മാസം പരീക്ഷ എഴുതാനിരിക്കുന്ന രണ്ടും മൂന്നും വര്‍ഷങ്ങളിലെ വിദ്യാര്‍ത്ഥികള്‍ക്കും സമാനമായ നടപടി നേരിടേണ്ടി വരും.