ഇന്ത്യയുടെ കളി കാണാന്‍ മുന്‍ നായകന്മാരെത്തിയില്ല; രോഷകുലരായി ആരാധകര്‍
സ്പോര്‍ട്സ് ഡെസ്‌ക്
Tuesday, 21st November 2023, 6:27 pm
അഹമ്മദാബാദ് നരേന്ദ്രമോദി ക്രിക്കറ്റ് സ്റ്റേഡിയത്തില്‍ നടന്ന ആവേശകരമായ ഏകദിന ലോകകപ്പ് ഫൈനലില്‍ ഇന്ത്യയെ ഓസ്‌ട്രേലിയ ആറ് വിക്കറ്റിന് തോല്‍പ്പിച്ചിരുന്നു. ഇന്ത്യന്‍ പ്രധാനമന്ത്രി നരേന്ദ്രമോദി ഉള്‍പ്പെടെ വിശിഷ്ട വ്യക്തികളും നിരവധി സെലിബ്രിറ്റികളും ഫൈനല്‍ കാണാന്‍ എത്തിയിരുന്നു. എന്നാല്‍ ഫൈനലിലെ മുന്‍ ക്യാപ്റ്റന്‍മാരായ കപില്‍ദേവിന്റെയും ധോണിയുടെയും അസാന്നിധ്യമാണ് ഇപ്പോള്‍ വലിയ ചര്‍ച്ചയാകുന്നത്.
ഇതുവരെ ലോകകപ്പ് നേടിയ എല്ലാ ടീമുകളുടെയും ക്യാപ്റ്റന്മാരെ ഫൈനലിലേക്ക് ക്ഷണിക്കുമെന്ന് നേരത്തെ വാര്‍ത്ത പ്രചരിച്ചിരുന്നു. എന്നാല്‍ ഇന്ത്യയുടെ കളികാണാന്‍ ധോണിയും കപില്‍ ദേവും എത്തിയിരുന്നില്ല.
‘നിങ്ങളെന്നെ ക്ഷണിച്ചു അതുകൊണ്ട് ഞാന്‍ വന്നു. അവര്‍ (ബി.സി.സി.ഐ) എന്നെ ക്ഷണിച്ചിരുന്നില്ല, ഇക്കാരണത്താല്‍ ഞാന്‍ പോയില്ല. അത്രയേ ഉള്ളൂ.193 ലോകകപ്പിലെ എന്റെ ഫുള്‍ സ്‌ക്വാഡും അവിടെ വേണമെന്ന് ഞാന്‍ ആഗ്രഹിച്ചിരുന്നു. പക്ഷേ ഒരുപാട് കാര്യങ്ങള്‍ സംഭവിച്ചുകൊണ്ടിരിക്കുകയാണ്. അവര്‍ക്ക് പല ഉത്തരവാദിത്തങ്ങളും ഉണ്ട്. ചിലപ്പോള്‍ ആളുകള്‍ മറന്നു പോകുന്നത് സാധാരണമാണ്, ‘ എ.ബി.പി ന്യൂസിനോട് കപില്‍ ദേവ് പറഞ്ഞു.