85 സൈനികരുമായി പോകുകയായിരുന്ന വിമാനം തകര്‍ന്നു വീണു; 40 പേരെ രക്ഷപ്പെടുത്താനായെന്ന് ഫിലീപ്പീന്‍സ് ആര്‍മി
ഡൂള്‍ന്യൂസ് ഡെസ്‌ക്
Sunday, 4th July 2021, 11:50 am
മനില: ഫിലിപ്പൈന്‍സില്‍ സൈനികരുമായി പോകുകയായിരുന്ന വിമാനം തകര്‍ന്നു. 85 സൈനികരാണ് വിമാനത്തിലുണ്ടായിരുന്നതെന്നാണ് പുറത്തുവരുന്ന റിപ്പോര്‍ട്ടുകള്‍.
40 പേരെ രക്ഷപ്പെടുത്തിയെന്നും മറ്റുള്ളവര്‍ക്കായുള്ള തെരച്ചില്‍ തുടരുകയാണെന്നും ഫിലീപ്പീന്‍സ് ആര്‍മി അധികൃതര്‍ അറിയിച്ചു.
ജോലോ ദ്വീപില്‍ വെച്ചാണ് അപകടം നടന്നത്. സൈനികരുമായി പോകുകയായിരുന്ന ഫിലിപ്പീന്‍സ് എയര്‍ഫോഴ്‌സിന്റെ സി-130 എന്ന എയര്‍ക്രാഫ്റ്റിന് ലാന്‍ഡ് ചെയ്യുന്ന സമയത്ത് ചില തകരാറുകള്‍ സംഭവിക്കുകയായിരുന്നെന്നാണ് പ്രാഥമിക നിഗമനം.
അപകടത്തിന്റെ ചിത്രങ്ങള്‍ പുറത്തുവന്നിട്ടുണ്ട്. തകര്‍ന്നിരിക്കുന്ന വിമാനവും ഇന്ധന ടാങ്കില്‍ നിന്നും തീയും പുകയും പുറത്തുവരുന്നതും ചിത്രങ്ങളില്‍ കാണാനാകും.
