മുസ്‌ലിം സമുദായത്തിനെതിരെ സോഷ്യല്‍ മീഡിയയില്‍ ആക്ഷേപകരമായ പോസ്റ്റ്; പൊലീസ് സ്റ്റേഷന് നേരെ കല്ലെറിഞ്ഞ 40 ഓളം പേര്‍ അറസ്റ്റില്‍
ഡൂള്‍ന്യൂസ് ഡെസ്‌ക്
Sunday, 17th April 2022, 2:30 pm
ബെംഗളൂരു:കര്‍ണാടകയിലെ ധാര്‍വാഡ് ജില്ലയില്‍ പൊലീസ് സ്റ്റേഷന് നേരെ കല്ലെറിഞ്ഞ സംഭവത്തില്‍ 40 ഓളം പേര്‍ അറസ്റ്റില്‍. ഒരു ഇന്‍സ്‌പെക്ടര്‍ ഉള്‍പ്പെടെ 12 പൊലീസുകാര്‍ക്ക് പരിക്കേറ്റിരുന്നു.പൊലീസ് വാഹനങ്ങളും ജനക്കൂട്ടം തകര്‍ത്തതായി ഉദ്യോഗസ്ഥര്‍ പറഞ്ഞു.
”മുസ്‌ലിം സമുദായത്തെ ലക്ഷ്യമിട്ട് ഒരാള്‍ സോഷ്യല്‍ മീഡിയയില്‍ ആക്ഷേപകരമായ ഒരു പോസ്റ്റ് ഷെയര്‍ ചെയ്യുകയും മറ്റുള്ളവര്‍ അതിനെ എതിര്‍ക്കുകയും പൊലീസില്‍ പരാതി നല്‍കുകയും ചെയ്തു. പൊലീസ് ഇയാളെ അറസ്റ്റ് ചെയ്യുകയും ഇയാള്‍ക്കെതിരെ കേസെടുക്കുകയും ചെയ്തു. എന്നാല്‍ ഇയാള്‍ക്കെതിരെ സ്വീകരിച്ച നടപടിയില്‍ തൃപ്തരാകാതെ, അര്‍ദ്ധരാത്രിയോടെ നിരവധി ആളുകള്‍ പൊലീസ് സ്റ്റേഷന് പുറത്ത് തടിച്ചുകൂടി,” ആക്രമണത്തെക്കുറിച്ച് പൊലീസ് പറഞ്ഞു.
