ഹരിയാനയില്‍ കര്‍ഷക സമരത്തിലേക്ക് ബി.ജെ.പി എം.പിയുടെ കാര്‍ ഓടിച്ചുകയറ്റിയ സംഭവത്തില്‍ പരാതി നല്‍കിയ കര്‍ഷകര്‍ക്കെതിരെ പൊലീസ് കേസ്
ഡൂള്‍ന്യൂസ് ഡെസ്‌ക്
Sunday, 10th October 2021, 4:11 pm
ചണ്ഡീഗഢ്: ഹരിയാനയില്‍ കര്‍ഷക സമരത്തിനിടയിലേക്ക് ബി.ജെ.പി എം.പിയുടെ കാര്‍ ഓടിച്ചു കയറ്റിയ സംഭവത്തില്‍ പരാതി നല്‍കിയ കര്‍ഷകര്‍ക്കെതിരെ കേസെടുത്ത് പൊലീസ്.
ബി.ജെ.പി എം.പി നയബ് സൈനിയുടെ കാറാണ് കര്‍ഷകര്‍ സംഘടപ്പിച്ച സമരത്തിലേക്ക് ഇടിച്ചുകയറ്റിയത്. സംഭവത്തിന് പിന്നാലെ സമരം സംഘടിപ്പിച്ച കര്‍ഷകര്‍ക്കെതിരെ പൊലീസ് മൂന്ന് കേസുകള്‍ എടുക്കുകയും ചെയ്തു. കര്‍ഷകരുടെ പരാതിയില്‍ ഒരു നടപടിയും പൊലീസ് എടുത്തിട്ടില്ല.
കഴിഞ്ഞ വ്യാഴാഴ്ചയാണ് ഹരിയാനയിലെ കര്‍ഷക സമരത്തിനിടയിലേക്ക് എം.പിയുടെ കാര്‍ ഓടിച്ചു കയറ്റിയത്. അപകടത്തില്‍ ഒരു കര്‍ഷകന് പരിക്കേറ്റിരുന്നു.
കുരുക്ഷേത്ര എം.പിയായ നയബ് സൈനിയും മന്ത്രി മൂള്‍ ചന്ദ് ശര്‍മയും മറ്റ് നേതാക്കളും അംബാലയില്‍ ഒരു പരിപാടിയില്‍ പങ്കെടുക്കാന്‍ വന്നതായിരുന്നു. കാര്‍ഷിക നിയമത്തിനെതിരെ ഇവിടെ ദിവസങ്ങളായി കര്‍ഷകര്‍ സമരത്തിലാണ്.
