കുഴല്‍ക്കിണറില്‍ വീണ രണ്ടുവയസ്സുകാരന്‍ മരിച്ചു; മൃതദേഹം പുറത്തെടുത്തു
ഡൂള്‍ന്യൂസ് ഡെസ്‌ക്
Tuesday, 29th October 2019, 7:52 am
തിരുച്ചിറപ്പള്ളി: തമിഴ്‌നാട് തിരുച്ചിറപ്പള്ളിയില്‍ കുഴല്‍ക്കിണറില്‍ വീണ രണ്ടു വയസ്സുകാരന്‍ സുജിത് മരിച്ചു. അഴുകിത്തുടങ്ങിയ മൃതദേഹം കുഴല്‍ക്കിണറിലൂടെ തന്നെ പുറത്തെടുത്തു.
നാലുദിവസമായി രക്ഷാപ്രവര്‍ത്തനം തുടരുകയായിരുന്നു. വെള്ളിയാഴ്ചയായിരുന്നു സുജിത്ത് കുഴല്‍ക്കിണറില്‍ വീണത്. പോസ്റ്റ്‌മോര്‍ട്ടത്തിനു ശേഷം കുട്ടിയുടെ മൃതദേഹം കുടുംബത്തിനു വിട്ടു നല്‍കി.
‘രാത്രി 9.30- ഓടെ കുഴല്‍ക്കിണറിനകത്തു നിന്നും അഴുകിയ മണം പുറത്തു വരുന്നതായി ഞങ്ങള്‍ക്ക് റിപ്പോര്‍ട്ട് ലഭിച്ചു. എന്‍.ഡി. ആര്‍.എഫും എസ്.ഡി.ആര്‍.എഫും ഫയര്‍ സര്‍വീസ് ക്രാക്ക് സംഘവും പരിശോധിച്ചപ്പോള്‍ കുട്ടിയുടെ ശരീരം വളരെയധികം അഴുകിയിരിക്കുന്നതായി അറിയിച്ചു’ , രക്ഷാപ്രവര്‍ത്തനത്തിന്റെ ചുമതയുണ്ടായിരുന്ന ഉദ്യോഗസ്ഥര്‍ മാധ്യമങ്ങളോടു പറഞ്ഞു.