കൊച്ചി: തൃപ്പൂണിത്തുറ ഗ്ലോബല് പബ്ലിക് സ്കൂളിലെ വിദ്യാര്ത്ഥി ആത്മഹത്യ ചെയ്ത സംഭവത്തില് പൊതുവിദ്യാഭ്യാസ വകുപ്പ് ഡയറക്ടര് നേരിട്ട് അന്വേഷണം നടത്തും. സ്കൂളില് നിന്നുണ്ടായ റാഗിങ്ങിനെ തുടര്ന്നാണ് മിഹിര് ആത്മഹത്യ ചെയ്തതെന്നായിരുന്നു കുടുംബത്തിന്റെ പരാതി.
കുടുംബാംഗങ്ങളും സ്കൂള് അധിക-തരും നാളെ കളക്ട്രേറ്റില് ഹാജരാകണമെന്നും നിര്ദേശമുണ്ട്. നാളെ എറണാകുളം കളക്ട്രേറ്റില് വെച്ച് പൊതു വിദ്യാഭ്യാസ ഡയറക്ടര് സിറ്റിങ് നടത്തുമെന്നും എഷ്യാനെറ്റ് ന്യൂസ് റിപ്പോര്ട്ട് ചെയ്തു.
മിഹിറിന്റെ ആത്മഹത്യ ചെയ്ത സംഭവത്തില് നേരത്തെ വിദ്യാഭ്യാസ വകുപ്പ് അന്വേഷണത്തിന് ഉത്തരവിട്ടിരുന്നു. സംഭവത്തെ കുറിച്ച് സമഗ്രമായ അന്വേഷണം നടത്തണമെന്നും നടപടികള് കൈക്കൊള്ളണമെന്ന് നിര്ദേശിക്കാനും പൊതുവിദ്യാഭ്യാസ ഡയറക്ടറോട് വിദ്യാഭ്യാസ മന്ത്രി വി.ശിവന്കുട്ടി ആവശ്യപ്പെട്ടിരുന്നു.
15കാരന് മിഹിര് പഠിച്ചിരുന്നതിരുവാണിയൂര് ഗ്ലോബല്പബ്ലിക് സ്കൂളിനെതിരെ ഗുരുതര ആരോപണങ്ങള് ഉയര്ത്തി കുടുംബം സംസ്ഥാന പൊലീസ് മേധാവിക്ക് പരാതി നല്കിയിരുന്നു. മകന് സ്കൂളില് നിന്ന് വര്ണവിവേചനവും ക്രൂര മര്ദനവും നേരിട്ടെന്നായിരുന്നു പരാതി. ഇതിനെ തുടര്ന്നാണ് വിദ്യാഭ്യാസമന്ത്രി അന്വേഷണത്തിന് ഉത്തരവിട്ടത്.
സ്കൂളിലെ ഏതാനും വിദ്യാര്ത്ഥികള് മകനെ ബാത്ത്റൂമില് കൊണ്ടുപോയി ക്ലോസറ്റ് നക്കിപ്പിക്കുകയും മുഖം പൂഴ്ത്തിവെച്ച് ഫ്ലഷ് അടിച്ചുവെന്നും പരാതിയില് ആരോപണമുണ്ട്. സോഷ്യല് മീഡിയയിലെ ചാറ്റുകളും സുഹൃത്തുക്കളുമായി നടത്തിയ സംഭാഷണങ്ങളും ചൂണ്ടിക്കാട്ടിയായിരുന്നു കുടുംബത്തിന്റെ പരാതി.
ആത്മഹത്യ ചെയ്ത ദിവസവും മകന് ക്രൂരമായ പീഡനത്തിന് ഇരയായിട്ടുണ്ടെന്നാണ് വിദ്യാര്ത്ഥിയുടെ അമ്മ നല്കിയ പരാതിയില് പറയുന്നത്. വിദ്യാര്ത്ഥിയുടെ മരണത്തെ തുടര്ന്ന് മകന്റെ സഹപാഠികള് ആരംഭിച്ച ജസ്റ്റിസ് ഫോര് മിഹിര് എന്ന ഇന്സ്റ്റഗ്രാം ആക്കൗണ്ട് പേജ് ഡിലീറ്റ് ചെയ്യപ്പെട്ടിട്ടുണ്ടെന്നും പരാതിയില് പറഞ്ഞിരുന്നു.
എന്നാല് പരാതിയിലെ ആരോപണങ്ങള് ഗ്ലോബല് പബ്ലിക് സ്കൂള് നിഷേധിച്ചു. ഇതുവരെ റാഗിങ് സംബന്ധിച്ച പരാതികള് ഒന്നും കിട്ടിയിട്ടില്ലെന്നും റാഗിങ് നടന്നതായി വിവരങ്ങളില്ലെന്നുമാണ് സ്കൂള് അധികൃതര് പ്രതികരിച്ചത്.
ജനുവരി 15നാണ് ഫ്ലാറ്റിലെ ഇരുപത്തിയാറാം നിലയില് നിന്ന് വിദ്യാര്ത്ഥി ചാടി മരിച്ചത്. തൃപ്പൂണിത്തുറ ചോയിസ് ടവറില് താമസിക്കുന്ന സരിന്-രചന ദമ്പതികളുടെ മകനാണ് മിഹിര്.
മുകളില് നിന്ന് വീണ കുട്ടി മൂന്നാം നിലയിലെ ഷീറ്റിട്ട ടെറസില് പതിക്കുകയായിരുന്നു. ഫയര്ഫോഴ്സ് എത്തിയാണ് മൃതദേഹം മാറ്റിയത്. ഗ്ലോബല് പബ്ലിക് സ്കൂളിലെ ഒന്പതാം ക്ലാസ് വിദ്യാര്ത്ഥിയാണ് മിഹിര്. തുടര്ന്ന് കുടുംബം നല്കിയ പരാതിയില് ഹില്പാലസ് പൊലീസ് നേരത്തെ കേസെടുത്തിരുന്നു.
Content Highlight: 15-year-old commits suicide in Tripunithura; The Director of Public Education will investigate directly