1000 Babies| ആദ്യ എപ്പിസോഡില്‍ സ്‌കിപ്പ് ചെയ്യേണ്ട; വെടിക്കെട്ട് ത്രില്ലറാണ് ഈ സീരീസ്
വി. ജസ്‌ന
Monday, 21st October 2024, 12:25 pm
സിനിമകളെ മാത്രമല്ല ഇന്ന് വെബ് സീരീസുകളെയും ഇഷ്ടപ്പെട്ട് തുടങ്ങിയിരിക്കുകയാണ് മലയാളികള്‍. അതുകൊണ്ട് തന്നെയാകാം മലയാളത്തില്‍ തുടര്‍ച്ചയായ സീരീസുകളെത്തുന്നത്. അന്യഭാഷകളിലെ വെബ് സീരീസുകള്‍ മാത്രം കണ്ടിരുന്ന മലയാളികള്‍ക്ക് ഇന്ന് സ്വന്തം ഭാഷയില്‍ മികച്ച വെബ് സീരീസുകളുണ്ട്.
വ്യത്യസ്തമായ പ്രമേയങ്ങള്‍ ചര്‍ച്ച ചെയ്യുന്ന സീരീസുകളാണ് മിക്കതും. നടന്‍ റഹ്മാന് നായകനായി ഏറ്റവും പുതുതായി പുറത്തിറങ്ങി വെബ് സീരീസാണ് ‘1000 ബേബീസ്’. ഹോട്ട്‌സ്റ്റാറില്‍ നിന്നുള്ള മലയാളത്തിലെ അഞ്ചാമത്തെ സീരീസാണ് ഇത്.
ആദ്യ എപ്പിസോഡിലെ ഈ വലിച്ചു നീട്ടല്‍ വല്ലാതെ മടുപ്പ് തോന്നിപ്പിക്കുന്നതാണ്. എന്നാല്‍ ആദ്യ എപ്പിസോഡ് മാത്രം കണ്ട് ഈ സീരീസ് കാണേണ്ടെന്ന് തീരുമാനിച്ചാല്‍ അത് ഒരുപക്ഷെ വലിയ നഷ്ടമാകും. കാരണം പിന്നീടങ്ങോട്ടുള്ള ഓരോ എപ്പിസോഡുകളും സസ്‌പെന്‍സും മിസ്റ്ററിയും നിറഞ്ഞവയാണ്.
റബ്ബര്‍ തോട്ടങ്ങള്‍ക്ക് നടുവിലുള്ള ഒറ്റപ്പെട്ട ഒരു വീട്ടിലാണ് സാറയും മകന്‍ ബിബിനും താമസിക്കുന്നത്. തന്റെ മുറിയിലെ ചുമരില്‍ പെര്‍മനെന്റ് മാര്‍ക്കര്‍ കൊണ്ട് എന്തൊക്കെയോ കുറിച്ചിടുന്ന സാറാമ്മയെ തുടക്കത്തില്‍ തന്നെ കാണിക്കുന്നുണ്ട്.
മരണക്കിടക്കയില്‍ കിടക്കുമ്പോള്‍ ഒരു കുമ്പസാരമെന്നോണം സാറാമ്മ പൊലീസ് ഓഫീസര്‍ക്കും മജിസ്‌ട്രേറ്റിനുമായി രണ്ട് രഹസ്യ കത്തുകള്‍ നല്‍കുന്നുണ്ട്. ഒരുപാട് ആളുകളെ ബാധിക്കുമെന്നതിനാല്‍ തങ്ങള്‍ അറിഞ്ഞ വിവരങ്ങള്‍ പുറത്തുവിടാന്‍ പൊലീസുകാരനും മജിസ്‌ട്രേറ്റും മടിക്കുകയാണ്.
മലയാളത്തില്‍ വന്ന വെബ് സീരീസുകളില്‍ വ്യത്യസ്തമായ ഒരു ശ്രമമെന്ന രീതിയില്‍ ഈ സീരീസിനെ കാണാവുന്നതുമാണ്. നടന്‍ റഹ്‌മാന്റെ കരിയറിലെ ആദ്യ വെബ് സീരീസ് കൂടെയാണ് ‘1000 ബേബീസ്’. റഹ്മാന് പുറമെ നീന ഗുപ്തയും സഞ്ജു ശിവറാമും പ്രധാനവേഷത്തില്‍ എത്തുന്നുണ്ട്. ഏഴ് എപ്പിസോഡുകളുള്ള ഈ സീരീസ് പ്രേക്ഷകരില്‍ ആകാംക്ഷയും സസ്‌പെന്‍സും നിറച്ചാണ് മുന്നോട്ടു പോവുന്നത്.