” രാജ് കുമാര്‍ ഹിറാനിയോട് ഞാനിക്കാര്യം സംസാരിച്ചിരുന്നു… ഇക്കാര്യം ഞങ്ങളുടെ മനസിലുണ്ട്. സഞ്ജയ് ദത്തിന് വേണ്ടി പ്രത്യേക സ്‌കീനിങ് ഏര്‍പ്പാടാക്കുന്നതിനെക്കുറിച്ച് ആലോചിക്കുന്നുണ്ട്. പക്ഷെ അതെല്ലാം അനുമതി ലഭിക്കുന്നതിന് അനുസരിച്ചായിരിക്കും. ഞങ്ങളുടെ കഴിവിന്റെ പരമാവധി പരിശ്രമിക്കും.” അമീര്‍ പറഞ്ഞു.
“പി.കെ” യില്‍ സഞ്ജയ് ദത്തിന് പ്രധാന റോളുണ്ട്. ജയിലിലായതിനാല്‍ ദത്തിന് ചിത്രം കാണാന്‍ സാധിക്കില്ല. അതുകൊണ്ട് അദ്ദേഹത്തിന് വേണ്ടി പ്രത്യേക സ്‌ക്രീനിങ് നടത്തുമോയെന്ന മാധ്യമപ്രവര്‍ത്തകരുടെ ചോദ്യത്തിന് മറുപടി നല്‍കുകയായിരുന്നു അമീര്‍.
“പി.കെ”യുടെ ഉള്ളടക്കമാണ് അതിന്റെ നട്ടെല്ലെന്നും അമീര്‍ പറഞ്ഞു. അതേസമയം ഈ ചിത്രത്തിന്റെ പോസ്റ്ററിന് വേണ്ടി തങ്ങള്‍ ഒരുപാട് കഷ്ടപ്പെട്ടെന്നും അദ്ദേഹം വെളിപ്പെടുത്തി.
“പി.കെ” റീലീസ് ഡേറ്റിന് തങ്ങളുടെ ചിത്രം റിലീസ് ചെയ്യാതെ സഹകരിച്ച സല്‍മാനും, ഹൃത്വിക്കിനും, അജയ് ദേവ്ഗണിനും അമീര്‍ നന്ദി പറഞ്ഞു. എല്ലാ ചിത്രങ്ങളും ആളുകള്‍ ഏറ്റെടുക്കണമെന്നാണ് തന്റെ ആഗ്രഹമെന്നും അദ്ദേഹം വ്യക്തമാക്കി.
വളരെ വ്യത്യസ്തമായ ഒരു ലുക്കായിരിക്കും “പി.കെ”യില്‍ തന്റേതെന്ന് നായിക അനുഷ്‌ക ഷര്‍മ പറഞ്ഞു. പുതിയ ഹെയര്‍സ്റ്റൈലിന് തനിക്ക് നിരവധി അഭിനന്ദനങ്ങളാണ് ലഭിച്ചുകൊണ്ടിരിക്കുന്നത്. ആളുകള്‍ അത് ഇഷ്ടപ്പെടുന്നുണ്ടെന്നും നടി അഭിപ്രായപ്പെട്ടു.
“പി.കെ”യുടെ ടീസര്‍ പുറത്തിറക്കിയശേഷം മാധ്യമങ്ങളോട് സംസാരിക്കുകയായിരുന്നു താരങ്ങള്‍. ഇതിനകം പുറത്തിറങ്ങിയ ചിത്രത്തിന്റെ പോസ്റ്ററുകള്‍ ഏറെ ചര്‍ച്ചയായി കഴിഞ്ഞു.